ISAYA
Mantû ma îbuku rîrî
Kwa îgiita rîîraaya mma, ta nkûrûki ya mîanka magana mana ûgu, anene bara baathanaga Isiraeri îgiita rîru i bo beeraga antû bûra bakaarûtha mantûûni mara meegagua marî ma gîtûmi mûno ûtûûrooni bwao. Na mantûûni mamu Ngai eeraga anene bathingate watho na bamenyithie antû kinya bo bathingate watho bûra aabeere gûkûrûkîîra Musa. Ngai aarûthaga ûgu n'ûntû eendaga mûgongo wa Isiraeri wîgua ûrî ngerekano îmbega ya kwonania bûra mûgongo ûra wathîkagîra watho bwa Ngai ûkaraga. Îndî, magiita mara maingî anene baarûthaga bûra barî bo boonaga bwagîrîîte. Wana kinya antû nwabu baarûthaga.
Rîra gwakarîkaga ûgu, Ngai aatûmaga iroria kîrî anene na kîrî antû bibakaania kûrûtha mantû mamu mataagîrîîte. Iroria bieraga antû ntûmwa ya Ngai na njîra inyingî. Magiita mara maingî biaroragia bikeeyana ngerekano na into bia wîthîre bira antû baiyî bwega mûno ta nyûngû kana matubaarî. Magiita mangî namo i rûgono iroria bieyanaga kana bikoonania ngerekano. Kûrî rîo iroria biainaga marîrî kana rwîmbo bûrî ûroria. Biarûthaga ûgu bikîgeria gûteethia antû bamenya mûno bûra Ngai eendaga beerira meeyia maao kaingo beegua barî antû ba mûkarîre ûra wagîrîîte, tau mûkarîre wa kûrûtha bûra watho bwa Ngai buugîîte. Iroria ibiagwetaga kinya bûra Ngai eendeete mûgongo wa Isiraeri na bûra eendaga Aisiraeri boonia mîgongo îra îngî wendo bûbu bwake. Îndî amwe noogu n'antû baakai na anene bamwe beegiirue bûra iroria biaugaga baarûtha bu. Bara baingî bataatindanîra na bio.
Isaya aarî ûmwe wa iroria bira biarî îgweta mûno na aatûûraga Njerusaremu, taûni îra nene rûteere rwa Njunda. Ngai aamûtuîkithiirie kîroria mûgongo wa Isiraeri ûgaûkanîîte maita maîrî. Kûrî bo beebîtaga Isiraeri na bangî Njunda. Isaya aaroriirie mûno, mûno, îgûrû rîa anene ba Njunda na bara baatûîre mbarî inu.
Isaya akîanjîîria kûroria, antû ba Njunda baarî na ûtonga bwingî mûno. Îndî ibaarî thîînaani n'ûntû îgiitaani rîru mûgongo wa Aramu ûra watûîre bwa neegûrû ya Njunda, wana wegua nwarî bantû aaraaya, nwarî ûkûgaania inya ya ndûa mûno. Warûaga na mîgongo îra îngî ûkamîkîria inya ûkamîatha. Njûûrî ya Asîîria yaarî înthûûku mûno, îtaarî kîao, na mîgongo îra îngî nîamîkuthûkaga n'ûntû îtaarî na njûûrî cia kûbarûîrîîra ta yao. Mûgongo wa Mbabironi wanau nwanjîîrîîtie kûgea inya ya ndûa na îgiita kwa îgiita nwarûaga na Asîîria ûkîgeria kûbakîria inya.
Ûroria bûra bûrî îbukuuni rîrî bunthe nwatûbugaanie maita mathatû:
Kuuma Gîcu. 1-39. N'ûroria bwa Isaya îgiita rîra Njunda yarî thîînaani ya gûturwa n'Asîîria. Isaya naarî akwona thîîna ya Njunda îtaarî Asîîria mûno, mûno. Thîîna yongwa yaarî meeyia ma mûgongo wao, kûrega kwathîkîra Ngai, na kûrega kûmwîtîgia. Isaya aaroriirie eera antû batûûre barî antû baagîru na barûthe bûra kwagîrîîte, baarega boone ûntû bûbarige na Ngai abathirie. Icuncîîni wa bibi Isaya naaroriirie auga ûkeegua kûrî na kagiita ka thîîrî nthîgûrû yonthe na kaîrî auga ûmwe wa rûrîîyo rwa Ndaundi akeegua arî mûnene ûra aagîrîîte.
Kuuma Gîcu. 40-55. Antû ba Njunda bara baingî baarî agwate Mbabironi thîînaani na batarî na wîrîgîîro. Îgiita rîru Isaya aaroriirie auga Ngai agaatûma antû baake bauma Mbabironi bacooka kwao Njerusaremu, baanjîîria ûtûûro bûngî. Ngai eerire antû ba Njunda ataabatiganîrîîtie na kwoogu batigaatige kûmwîtîgia na kûmwîrîgîîra.
Kuuma Gîcu. 56-66. Ngai naarî akûruta antû ba Njunda ûkombooni Mbabironi abacookia Njerusaremu. Antû i beendaga kûmenya kana Ngai akaingia wîrane bûra aabeete. Îgiita rîru Isaya aaroriirie auga Ngai eendaga antû beegua baagîrîîte, bakîrûthaga bûra kwagîrîîte, bakîririkanaga ntugû ya Sabatû, bakîrutaga igongwana na bakîmûrombaga.
Gwookubî îbuku rîrî rîkari ûûgû:
Nkaanua na mawîrane (1:1-12:6)
Îkaanûkia rîa mîgongo (13:1-23:18)
Ngai kûgiitîra nthîgûrû îgamba (24:1-27:13)
Nkaanua na mawîrane nkûrûki (28:1-35:10)
Mûnene Esekia wa Njunda na Asîîria na antû ba Mbabironi (36:1-39:8)
Ntûmwa cia wîrane na wîrîgîîro (40:1-55:13)
Nkaanua na mawîrane (56:1-66:24)