Ithaarimo bia mîgongo yonthe
56
1 Ûûgû i bu Mwathani akuuga,“Aigaani ûmma
na bûrûthage bûra kûbatîîrue,
n'ûntû wonokio bwakwa bûrî aakubî
na wagîru bwakwa bûkoonanua kagiita gatarî araaya.
2 Kîthaarimo i kîrî muntû ûra arûthaga ûûgû,
ûra arûthaga bwega,
ûra amenyagîîra Sabatû na akamîtîîya,
na akarigîîria njara yake îtikeeyie na njîra nwa îrîkû.”
3 Gûtikaagîte mûgeni ûra eeneenkanîrîte kîrî Mwathani akauga,
“Na mma Mwathani atiintaranîria amwe na antû baake.”
Na gûtikaagîte muntû ûmûkabe akaanung'una auga,
“Niû ndî mûtî ûmûûmo.”
4 N'ûntû ûûgû i bu Mwathani akuuga,
“Kîrî muntû ûmûkabe ûra amenyagîîra Sabatû,
ûra athuuraga bûra bûnkenagia,
na akamenyeera kîrîîkanîro gîakwa,
5 nkabaneenkera ndeeni ya nyomba yakwa,
mûririkana na riîtwa,
rîega kîrî nthaka na aarî.
Nkabaneenkera riîtwa rîa tene na tene,
rîra rîtakooro rîûra.
6 Na ageni bara bakeeneekanîra kîrî Mwathani,
bamûtûmîkagîra,
beendaga riîtwa rîa Mwathani,
na kûmûgongaga,
bonthe bara bamenyagîîra Sabatû na bakamîtîîya
na bakamenyeera kîrîîkanîro gîakwa,
7 nkabareeta kîrîmaani gîakwa kîîtheru Njerusaremu,
na mbaneenkere gîkeno ndeeni ya nyomba yakwa ya maromba.
Igongwana bira bibîîthagua na igongwana bira bingî,
bigeetîgîîrîka kîthînjîrooni gîakawa
n'ûntû nyomba yakwa îgeetagwa
nyomba ya maromba ya mîgongo yonthe.”
8 Mwathani Mwene Inya ariuga,
we ûra eethîranagia atae ba Isiraeri ariuga,
“Nkabeethîranîria bangî
îgûrû rîa bara mbîthîranîîtie mwanka agu.”
Atongoria baathûûku baathitangwa
9 Ncûûni bwinthe biû nyamû cia kîthaka,
ncûûni bûtagutane, biû bwinthe nyamû cia mûthitû.
10 Akaria ba Isiraeri i ntûngi,
batirî na ûmenyo,
bonthe i kurû ipûra,
itiûmba gûkûûma.
Beegarîkaga woogu bakîrootaga,
i beendeete kûmaama mûno.
11 Bo i kurû i rî bata îmbîî,
batiganagia nwa rî.
N'arîîthi bara batarî na ûmenyo,
woora muntû athiiyaga njîra yake,
woora ûmwe waciao akîgeragia gwîteethia.
12 Baugaga, “Ncûûni, ga tûthûkie ndibei!
Ga tûnyueni mwanka tûbae ncoobi!
Na rûû rûkeegua rûkari ta îmunthî,
kana rûrî rwega nkûrûki.”