Kûgambithua gwa Isiraeri n'ûntû bwa kûgonga ngai cia ûrongo
57
1 Muntû ûmwagîru akuuyaga,na gûtirî we athûgaanagîria ûntû bûbû nkorooni yake.
Antû beerutîrîîte bathûkagua,
na gûtirî we aciûkagîrwa
atî antû baagîru bathûkagua
kaingo boonokua kuumania na ûthûûku.
2 Bara barî na mîthiîre îmîega
bathiiyaga ûkiriini,
bakoona kînogoko baakua.
3 “Îndî biû, ncûûni aaga. Biû aana ba mûka mûrogi,
biû aana ba athûûngîîri na ba marwaya!
4 N'ûû bûkûthekeera?
N'ûû we bûkûnyûrûnta
bûkîndutagîra ndîme nja?
Anga biû bûtirî rûciaro rwa ndemi,
rûrîîyo rwa arongo?
5 Bûrombaga ngai cia ûrongo gatîgatî ka mîpuru
na ruungu rwa mîtî îra mînene.
Bûrutagîra aana beenu igongwana iguuruuni
na ruungu rwa nkûûrûba cia maiga.
6 Ngai ciaku i maiga mara matenderu marî iguuruuni,
îî, ngai inu i cio rûgai rwaku.
Na mma inu i cio gwîtûûragîra biewa bia biakûnyua,
na ûkairutîra biewa bia irio.
Gûkari ûgu rî, nwaka ngaakirîra mantû mama?
7 N'ûrûthîîte ûrîrî bwaku îgûrû rîa irîma bira biraaya
naagu i noo wîtagia kûrutîra igongwana biaku.
8 Nyuma ya mîrango na mbureemuuni cia mîrango yaku,
i noogo waigîîte ngai ciaku cia ûrongo.
Wantiganîria, waguûria ûrîrî bwaku,
Watwa ku na wabûguûria kûrû
warûtha irîîkanîro na eene itanda bira weendaga,
wakeneera kwona mîîrî yao îrî ûtheri.
9 Wathiire kîrî ngai yeetagwa Moreku na maguta ma mîceituuni
waruta biewa bia mîtaa.
Watûma atûmwa kûûraaya
mwanka wathi nthîgûrû ya bara bakuû,
ûgîceria ngai i ngeni cia wendo.
10 Nwanogiirue i ntiga inu ciaku,
îndî ûtauga, ‘Îno i ngûgî ya mana.’
Inya yaku n'yerûagua,
na ûtaagiriira.
11 N'ûû ûyu agûtûma ûkuthûka na ûguaya,
mwanka ûkambenagîîria,
na ûkarega kûndirikana
kana ûkarega kûthûgaania nwa ta nkorooni yaku?
I bûra ngûkirîrîte kagiita karaaya,
n'ûntû ûtagûnkuthûka?
12 Nkaanîka wagîru bwaku na ngûgî yaku,
na bibu bitigûteethia.
13 Warîra kaingo ûteethua,
ga twone ingî mûkwîrî wa ngai ciaku cia ûrongo îgîgûteethia!
Ruuo rûgaikamata cionthe ithi,
mîruke îcibue ithi kûûraaya.
Îndî muntû ûra antuîkithagia kîîbitho gîake
akeewa nthîgûrû rûrî rûgai rwake,
na kîrîma gîakwa kîîtheru gîtuîke gîake.”
Kûboorerua kîrî bara beenyiiagia
14 Mwathani ariuga ata rî,
“Akaani, akaani, thuuranîraani njîra.
Rutaruta irigîîria biume njîraani ya antû baakwa.”
15 N'ûntû ûûgû i bu Ûra Mûtheru na Arî Îgûrû Mûno,
ûra atûûraga tene na tene, na ûra riîtwa rîake rîrî rîîtheru, akuuga,
“Ntûûraga ara arî îgûrû na aatheru,
na ngaatûûra na muntû arî na nkoro ya kwînyiia,
kaingo ndiûkia nkoro cia bara beenyiiagia.
16 Ntiithitangana tene na tene,
na ntiikaraga nthûûri rîonthe.
Ngakara ûgu antû baingî mûno i bakua,
mîoyo ya bara bonthe mbûmbîîte îkathira.
17 I ndaathûûrîîtue n'îkunûka rîake,
ndamûkaanûkia, na ndaitha ûthiû bwakwa i mûthûûro,
îndî aathi na mbere na mîkarîre yake ya ûremu.
18 I mboneete mîkarîre yake, îndî nkamworia,
nkamûtongoreeria na mûcookerie kûganîrwa.
19 Ngaatûma bara barî na kîeba Isiraeri baina nyîmbo cia gûkumia.
Ûkiri bûkaagîa kîrî bara barî kûûraaya na gûûkubî,”
ûgu i bu Mwathani ûra abooragia akuuga.
20 Îndî bara bathûûku bakari ta îria rîkuumbuthûka mîkumbîîrî,
rîra rîtanogokaga,
rîra makûmbî marîo makunjugûragia rûûyî na ntaga na rûko.
21 Ngai wakwa ariuga, “Gûtirî na ûkiri kîrî bara bathûûku.”