Gûtîîrîra biakûrîa kwa mma
58
1 “Riinga gîtuma, ûtigaakire.Ûkîîria kayû gaaku ta karumbeta.
Îra antû baakwa îbîtia rîao
na mûciî wa Njakubu meeyia maao.
2 N'ûntû bandombaga ntugû cionthe,
bakîendaga kûmenya njîra ciakwa,
ta barî mûgongo ûra ûrûthaga bûra kûbatîîrue
na ûtatiganîrîtie maathana ma Ngai waku.
Bambûûragia matua mara mabatîîrue
na i beendaga Ngai aaya akubî nabo.
3 Baûragia, ‘I mbi tuingîrîte biakûrîa,
na ûtikwona?
I mbi twînyiîrîîtie,
na ûtikwona?’
Amwe na ûgu ntugû îra bûkûrûkîrîîte biakûrîa,
bûrûthaga bûra bûkwenda,
na bûkainyîîria aruti ngûgî beenu.
4 Gûtîîrîra biakûrîa kwenu kûrîîkagîîria na matheta na ndûa,
na kûringana na nkundi.
Bûtitîîragîra biakûrîa bûra bûkûrûtha îmunthî
na bwîrîgîîra kayû keenu keeguîka îgûrû.
5 Gûkû i ku gûtîîrîra biakûrîa kûra nthuurîîte,
ntugû îmwe akî ya muntû kwînyiia?
N'ya muntû kwîndamîîria kîongo akî ta rûthanje
na ya kûmaama makuniani na muuni?
Gûku i ku bwîtaga gûtîîrîra biakûrîa,
ntugû îra îîtîgîîrîkîîte kîrî Mwathani?
6 Arî, gûtîîrîra biakûrîa kûra nthuurîîte i ta gûkû:
kûtharia nyororo cia kwinyanîîria
na kûtharia mîkanda ya îcoki.
Kûrekeeria bara bainyîîrie
na kuunanga macoki monthe.
7 I kûgaîra bara barî na yûûra irio bienu
na kwaa nkîa ira itarî mîciî ûmaamo.
Rîra wona ûra atarî na nguo, ûkamwa nguo,
na ûtigaatiganîrie antû ba mûciî wenu.
8 Rîru werû bwenu bûkaathararia ta rware rûgîtema,
na kworua kwenu gûkooneka na mpwî.
Rîru wagîru bwenu bûkabûtongoreeria bûrî mbere yenu,
na ûkumio bwa Mwathani bûkeegua bûrî nyuma yaku bûkûrigîîrie.
9 Rîru ûkaaromba, na Mwathani agakwîgua,
ûkaaromba ûteethio, na agakwîra, ‘Ndî aaga.’
Bwatiga kwinyanîîria,
na kworootana na kwaria naaî,
10 na bweruta n'ûntû bwa bara barî na yûûra
na bwaûyûria moobatu ma bara bainyîîrie,
rîru werû bwenu bûkaathararia mwinduuni.
Ûtugû bwenu bûgaakara ta thaa thiita cia mûthenya.
11 Mwathani agagûkaria rîonthe,
akaûyûria ma ûbatu maaku nthîgûrû îra yarîîte riûa
na agagwîkîra inya.
Ûgaakara ta kamûnda gaatûûrîrie rûûyî bwega,
ta kauro kara rûûyî rûtabweyaga.
12 Antû baaku bagacookeeria maganjo ma tene
na bagaûkîîria mîcingi îra mîkûrû.
Ûgeetwa mûcookeeria wa nthingo ira mbomoku,
mûcookeeria wa tûbarabara na ikaro.”
13 Mwathani ariuga, “Bwamenyeera magûrû meenu matikaune watho bwa Sabatû
na kûrûtha bûra bûkwenda ntugû yakwa întheru,
bwatuîkithia Sabatû ntugû ya gîkeno
na ntugû ya Mwathani întheru na ya gîtîîyo,
na bwamîtîîya na njîra ya kûrega kûthi na njîra cienu,
na kûrega kûrûtha bûra bûkwenda kana kwaria mîgambo îmîthûûku,
14 rîru bûkoona gîkeno kîenu ndeeni ya Mwathani.
Ngaatûma wathana ûrî gûntû kûra gûûkîîru nthîgûrû,
na ûrîa rûgai rwa abaagu Njakubu.”
I Mwathani wengwa akuuga ûgu.