Wîyia, kwîrira na gûkûûrwa
59
1 Thikîîria! Njara ya Mwathani ti nkubî, îremwa i kwonokaniakana gûtû wake kwingara, kûremwa i kwîgua.
2 Îndî ûthûûku bwenu i bu bûbûtigithanîîtie
na Ngai wenu.
Na meeyia meenu imaithîîte ûthiû bwake bûtikaabuone,
wana atikwenda kwîgua.
3 N'ûntû njara cienu iciîkîrîîtwe mûgiro i nthakame,
na biara bienu ibiîkîrîîtwe mûgiro.
Mîromo yenu n'yarîîtie ûrongo,
na ndîme cienu ciaria bioye bia ûthûûku.
4 Gûtirî we ûthûgaanagia kûrûtha bûra kûbatîîrue,
kana eetheteera na ûmma.
Beerîgagîîra mantû ma mana, baaragia ûrongo,
bagîîyaga nda cia thîîna, bagaciara ûthûûku.
5 Bakomoragia makome ma njoka
na bagatuma rûûî rwa mbûbûî.
Ûra wonthe ûrîyaga makome maao agaakua,
na rîra rîmwe rîakua, rîkomokaga njoka.
6 Ndûûî ciao i cia mana, itiûmba kûrûtha nguo,
batiûmba kwîguîka na kîra barûthaga.
Ngûgî ciao i ngûgî inthûûku,
na ngûgî cia ûgîti irî njaraani ciao.
7 Magûrû maao maugagîria ûthûûku,
barî mpwî cia gwîtûûra nthakame îtarî na mabîtia.
Mathûgaania maao i mathûgaania maathûûku,
maganjo na wînyangia birî njîraani ciao.
8 Batiiyî njîra ya ûkiri,
gûtirî gûtuuyanîra magamba bûra kûbatîîrue njîraani ciao.
Baigarûrîîte ciatuîka njîra inthûûku,
gûtirî we ûthiiyaga nacio akeegua arî na ûkiri.
9 Kwoogu kûgiitanîra magamba bûra kûbatîîrue kûrî kûraaya naati,
na wagîru bûtitûkinyagîra.
Tûcwaga werû, îndî i mwindu mûtheri,
tûcwaga mûthararî, îndî tûthiiyagîra mwinduuni ûmûrumanu.
10 Twataataga tûgîcwa rûthingo ta ntûngi,
twondagia njîra ta antû batarî meetho.
Tûtarataraga thaa thiita ta kûrî na rwiriiri,
gatîgatî ka bara barî na inya, tûkari ta antû baakuû.
11 Twinthe tûrîruruma ta ndûba,
tûrîrîra na kîeba ta macea.
Tûrîcwa gûtuîrwa îgamba bûra kûbatîîrue, îndî tûtikwona,
tûgacwa wonokio, îndî bûrî kûraaya.
12 N'ûntû mabîtia meetû i maingî mbere yaku,
na meeyia meetû imagûkûûyîîra îgûrû rîetû.
Tûrî na mabîtia rîonthe,
na tûkûmenya mabîtia meetû,
13 ma kûûma kîongo na gûkaana Mwathani,
twaûndûkîria Mwathani wetû mîgongo,
tûkîaragia mantû ma bitina na kwinyîîria,
tûkîaragia ûrongo bûra bûrî nkorooni cietû.
14 Na kûgiitanîra magamba bûra kûbatîîrue igûcookeete nyuma,
na wagîru bûrî kûraaya.
Ûmma i bûtaratarîîte barabaraani,
na wagîru bûtiûmba kûthûngîra.
15 Ûmma i bûûrîîte kûrû,
na ûra atigaga ûthûûku eetuîkithagia mûgwate.
Mwathani aaraitha mantû mamu, aathûûra
n'ûntû gûtaarî na kûgiitanîra magamba bûra kûbatîîrue.
16 Oona atî gûtaarî nwa ûmwe,
aarigara atî gûtaarî na muntû nwa ûmwe wa kûromba.
Kwoogu njara yake yongwa n'yo yaamûreteere wonokio,
na wagîru bwake bungwa i bu bwamûtûûriirie.
17 Eekîra ûmma ta nguo kîbaraani,
na nkoobia ya wonokio kîongo gîake,
eekîra nguo ya kwîrîîria
na eeboga na rûriitho ta nguo îndaaya.
18 Kûringana na bûra barûthîîte,
nwabu akaarîithia
anthû baake na mûthûûro,
aîrîîrie kîrî anthû baake.
19 Kuuma ûthwîro bwa riûa, antû bagaakuthûka riîtwa rîa Mwathani,
na mwago wake kuuma uumîîro bwa riûa.
Rîra mûnthû akaathûngîra
akari ta îkondoria rîa muuro,
Kîrundu wa Mwathani,
agaûkîîra kiuthatî n'we.
20 “Mûkûûri akaaya Sayuuni,
kîrî bara barî ndeeni ya Njakubu bara beerirîîte meeyia maao,”
i bu Mwathani akuuga.
21 “Mantûûni maakwa, gîkî i kîo kîrîîkanîro gîakwa nabo,” i bu Mwathani akuuga. “Kîrundu wakwa, ûra arî îgûrû rîenu, na mîgambo yakwa îra mbîkîrîte kanyuani gaaku, îtiuma kanyuani gaaku kana tûnyuani twa aana baaku, kana kuuma tûnyuani twa nciarwa ciao, kuuma îîndî na kûthi mbere, tene na tene.” Ûgu i bu Mwathani akuuga.