RWÎMBO RWA SOROMONI
Mantû ma îbuku rîrî
Waûmba kwîgua îbuku rîrî rîa Rwîmbo rwa Soromoni rîandîkirwe i mûnene Soromoni gîntû ta mîanka ngiri îmwe mbere ya gûciarwa kwa Yiesû. Îbuku rîrî, rîrî na nyîmbo cia wendo, kûra mûka na muntû mûrûme bakwereecana na bakumbûranîra wendo bwao. Rîmwe barîaria îgûrû rîao na rîngî bakaaria îgûrû rîa acoore baao, na magiita mamwe bakaririkana bûra baakarangaga agu kabereeni. Îbuku rîrî i rîtaûragwa na njîra ciîrî mûkûûrani; taka rîkwaria kîînjuno na taka rîkuuga wa ûgu rîandîkîîtwe. Rîra rîgûtaûrwa taka rîkwaria na njuno rîthûkagua rîkîaria mantû ma gîîkîrundu. Mûtaûrîre ûyû n'uu gwetîgîîrîkire mbere ya ûra ûngî. Akîrîstû bathûkagia îbuku rîrî rîkîaragia îgûrû rîa wendo bûra bûrî oogo gatîgatî ga Kîrîstû na Kanica. Mûtaûrîre ûyu ûngî nau uugaga atî îbuku rîbatîîrue rîereeka wa ûgu rîandîkîîtwe; atî rîaragia îgûrû rîa wendo bûra bûrî oogo gatîgatî ga antû baîrî. Kinya mûtaûrîre ûyû nau n'ûgwîtîgîîrîka amwe na ûyu ûngî. Gîcu. 8:6-7 i kîmwe kîa bira birî îgweta mûno îbukuuni
Ndinga ta mûûni nkorooni yaku, kana ta mûûni njaraani yaku. N'ûntû wendo bûrî inya ta gîkuû, na mwanki wabu ûûmîîte kiongo ta nthiko. Wendo bwenagia ta mwanki, ta rûrîrîmbî rûûnene rwa mwanki. Ndûûyî imbingî itiûmba kûbûûtûgia wendo; kana miuro îbukondoria. Muntû akageria kûnenkanîra ûtonga bwake bunthe akîgûra wendo, aûkania na kûgîa îgi.
Gwookubî îbuku rîrî rîkari ûûgû:
Rwîmbo rwa mbere (1:1-2:7)
Rwîmbo rwa ciîrî (2:8-3:5)
Rwîmbo rwa ithatû (3:6-5:1)
Rwîmbo rwa inya (5:2-6:3)
Rwîmbo rwa itaano (6:4-8:4)
Rwîmbo rwa ithanthatû (8:5-14)