Mwarî
2
1 Nthongamîîte ta yûûa rîa Saroni,mbuîte ta yûûa rîa kîbonde.
Mûthaka
2 Wa ta îûa gatîgatî ka mîîgua,
i bu mwendwa wakwa akarî gatîgatî ka aarî bara bangî.
Mwarî
3 wa ta mûtî wa matunda gatîgatî ka mîtî ya kîthaka,
i bu mwendwa wakwa akari akîbuanaanua na nthaka ira ingî.
Ingûkeneera gûkara mûgunyeeni wake,
na îtunda rîake i rîgûcama bwega.
4 Aambirire mwanka nyomba ya kîatho
akîonania bûra ambendeete bûgana.
5 Ndûmiani ncabiibû kaingo ncookerwa n'inya yakwa,
na ûnkenie na matunda,
n'ûntû i ngirirîîte i wendo.
6 Njara yake ya kîmotho îrî rungu rwa kîongo gîakwa,
na njara ya ûrîo n'yo nînkumbatîrîtie.
7 Biû aarî ba Njerusaremu, thiîtiani na nthia na nkûrûngû,
buuge bûtiindûkîria kana bûûkia wendo
mwanka kagiita kara kaagîrîîte.
8 Inkwîgua kayû ka mwendwa wakwa.
Aayîîte augîîtie irîmaani,
agîtûûbaga ataambîîte na tûrîma aayîîte kîrî niû.
9 Mwendwa wakwa akari ta nkûrûngû îra njiûku kana nthia îtarî nkûrû mûno.
Raitha, arûngi nyuma ya rûthingo!
arîcûûbîîria na ndirica,
araithîîrîîtie nyomba ndeeni.
10 Mwendwa wakwa arîmbîîra,
“Ûkîîra, mwendwa wakwa,
woû ûra mûthongi,
na tuumagarûke.
11 N'ûntû kagiita ga mpîo gagûkûrûka,
na mbura îgûkea.
12 Mîtî nîkûraa,
na kagiita ka nyoni kwina gagûkinya,
kinya nyîmbo cia macea nikwîguîka nthîgûrû yetû.
13 Mîkûyû n'yambîîrîîtie gûciara,
na mîcabiibû nîkûraa, na nîkûnunka bwega!
Ûkîîra, mwendwa wakwa,
woû wakwa ûmûthongi, tûthi.”
Mûthaka
14 Ûkari ta îcea rîra rîîbithaga
mbacaacîîni cia rwara.
Ka mbone ûthiû bwaku,
na mbîgue kayû gaaku,
n'ûntû kayû gaaku i kaathongi,
na ûthiû bwaku ibûûthongi.
15 Tûgwatîreeni tûbwee,
tûbwee tûra tûniini
tûra tûkwînyangia mînda ya mîcabiibû,
n'ûntû mîcabiibû yetû nîkûraa.a
Mwarî
16 Mwendwa wakwa n'wakwa, naani ndî wake.
Arîîthagia ng'ondu ciake maûani.
17 Rîra gûkaarura na irundu bithi,
ncookeera, mwendwa wakwa.
Ugia ta nkûrûngû
kana nthwariga îtarî nkûrû mûno irîmaani birî na mîonto.