MÛTÛMÎÎRIA
Mantû ma îbuku rîrî
Îbuku rîa Mûtûmîîria rîandîkîîtwe i muntû ûkwîbîta Mûtûmîîria, mwana wa Ndaundi, mûnene wa Njerusaremu. Nkûrûki itûthoomaga bûra aagîtire ûtonga bwingî na eekûrû baingî. Na itûthoomaga mantû meegiî ûûme bwake. Kwoogu i kwonania muntû ûyû nwa mwanka wîgue aarî mûnene Soromoni ûra eerwe ûûme bûûnene mûno i Ngai na atûûra ûtûûro bwa ûtonga na ikeno na aagûra aka baingî mûno.
Mûtûmîîria aandîkîîte îbuku rîrî ta mûkûrû akîraithaga ûtûûro bwake bwa naagu nyuma. Arîtwîra n'erutanîrîîtie na nkoro yake yonthe gûceria ûûme bwa nthîgûrû. N'endaga gûceria ikeno bionthe bia mûtûûrîre. Eecereria into na ikeno bionthe bira eendaga kwîgua arî na bio. Îndî atikwonekana arî na bata na mantû ma Ngai kagiitaani gaku. N'ageragia kwona kana ûkeegua kûrî na mûkûûrani wa gûtûûra ûtûûro bwa ûûme kana bwa waa. Wana kinya n'arigaraga i gîtûmi gîa gûtiira muuru. Na akarîkîîria na kuuga mantû monthe i ma mana.
Wa ûntû na kagiita kaabu, îndî tûtiiyî magiita ma Ngai. Antû bonthe i bakuuyaga wa ta bûra nyamû ikuuyaga. Mûtûmîîria nagûtûîra îgûrû rîa mantû maingî mara ooneete magîkarîka aaga nthîgûrû. Gûtirî na kûgiitanîra magamba bûra kûbatîîrue. Kûrî na mantû maingî mara mataûmba kûmenyeka bwega. Arîkara agîcookagîra kaîrî na kaîrî akiugaga, “Wana bûbû i bwa mana.”
Îgiita na îgiita nagûkara agatwa ûkûrû na njuno mwanya mwanya na agatwerekeeria kîrî Ngai.
Waûmba kwîgua ntûmîîri îra nene ya îbuku rîrî, i kuuga kûgeria gûceria gîtûmi gîa ûtûûro nthîgûrû îno i ngûgî ya mana. Tûtiûmba kûmenya iriga bia ûtûûro nwanga Ngai wenka wiyî. Kwoogu nwa mwanka twîtîgîîrie watho bwa Ngai ûtûûrooni bwetû. Na i kîo gîgûtûma mûtûmîîria atwerekeeria kîrî Ngai. Arîtwîra Ngai naiyî mantû mara tûtaiyî na agatwîra tûkeneere ngûgî ira Ngai atwete na tûkuthûke Ngai. Na waûmba kwîgua we wengwa naiyî maumithio ma kûrega kûrûtha ûûgû, na nagûtaara aana baîthî akabeera bacerie mûûmbi wao rîra barî nainya n'ûntû kagiita gakaaya bakeegua batarî na wîru na inya kûrûtha ûgu.
Mûthiani wa îbuku rîrî, nyuma ya gûceria gîtûmi gîa ûtûûro gwa kagiita kaaraaya arîrîkîîria na kuuga.
“Nyuma ya mama monthe, kûrî na ûntû bûmwe akî bwa kuuga: kuthûka Ngai, na wathîkîre maathana maake. N'ûntû bûbû i bu antû babatîîrue barûtha. N'ûntû Ngai agatûgambithia n'ûntû bwa ûntû bunthe bûra tûrûthaga, bûrî bwega kana bûûthûûku, kinya mara marûthagîrwa withooni.” (12:13-14)
Gwookubî rîrî i rîo îbuku rîa Mûtûmîîria:
Mantû monthe i ma mana 1:1-2:23
I Ngai weyanaga gîkeno 2:24-26.
Îgiita rîa ûntû bunthe 3:1-8.
Ngûgî îra Ngai aneenkereete antû 3:9-15.
I Ngai wiyî bûra gûgaakarîka Nyumaani 3:16-22.
Gûtirî kûgiitanîra magamba bûra kûbatîîrue nthîgûrû 4:1-7.
Ti bwega kwîgua ûrî wenka 4:7-12.
Wana kinya mûnene ûmwega akaariganîria 4:13-16.
Kuthûka Ngai 5:1-7.
Ûtonga I bwa mana 5:8-6:12.
Mathûgaania îgûrû rîa ûtûûro 7:1-8:1.
Athîkîra mûnene 8:2-8.
Ûthûûku na wagîru 8:9-17.
Gîkuû kîîyagîîra bonthe 9:1-12.
Mathûgaania îgûrû rîa ûûme na waa 9:13-18.
Mathûgaanio na mataaro mangî kuuma kîrî mûtûmîîria 10:1-20.
Bûra muntû ûmûûgî arûthaga 11:1-8.
Mataaro kîrî aana baîthî 11:9-12:8.
Mantû ma kûthirîkîria 12:9-14.