Gûtirî kûgiitanîra magamba bûra kûbatîîrue nthîgûrû
4
1 Rîru ndaaraitha kaîrî kwinyîîrua kûra wîgagua kûrî nthîgûrû îno. Ndoona meethori ma bara bainyîîrie na gûtarî na wa kûbakirakiria. Bara baabainyagîîria ibaarî na inya nkûrûki. Na gûtaarî na wa gûkirakiria bara bainyagîîrua. 2 Kwoogu ndaathûgaania, ndoona bara bakuû i beega nkûrûki ya bara batwîre mwoyo; 3 na bara barî kaaba mûno kîrî bonthe, i bara bataaciarwa, bara batoona moothûûku mara marûthagwa nthîgûrû îno.4 Kinya i mbûyîîte kûmenya i kî n'ûntû antû barutaga ngûgî nainya na waara kaingo bagîa na into: n'ûntû bwa kwîgîîrua atûûri baao rûriitho. Îndî wana bûbû i bwa mana, i ta kwîngana na ruuo.
5 Antû bara biaa baregaga kûruta ngûgî
na bakagwa i yûûra.
6 Kaaba kwîgua ûrî na gantû kaniini ka rwî rûmwe ara kûrî na ûkiri,
nkûrûki ya kwîgua ûrî na biingî ara kûrî na guutîka rîonthe,
na kwîngana na ruuo.
Ti bwega kwîgua ûrî wenka
7 I mboneete ûntû bûngî bûra bûrî bwa mana aaga nthîgûrû: 8 Aaga kûrî na muntû atûûraga wenka. Atirî na mwana kana mûruagina. Amwe na ûgu, arutaga ngûgî rîonthe, na atiganagîrwa n'ûtonga bûra arî nabu. Akeebûûria, “N'û we ngûtiirîra nthî na ngîîperagia ikeno?” Kinya bûbû i bwa mana na i mûtûûrîre wa thîîna. 9 Antû baîrî i beega nkûrûki ya ûmwe, n'ûntû barî amwe bakoona maumithio meega nkûrûki kuumania na ngûgî yao. 10 Ûmwe akagwa nthî ûyû ûngî nwa amûûkîîrie. Îndî ûkeegua muntû n'wenka na akagwa, ûtiîgua kûrî na muntû wa kûmûûkîîria. 11 Baîrî nwa bamaame amwe bakarugutanîîria, îndî n'ata ûûmba kwîrugutîîria ûrî wenka? 12 Muntû arî wenka nwa aithûkîrwe na agaturwa, îndî baîrî nwa bateethanie na bakaûmbana. Mwîndo ûmwînde na ndigi ithatû bûrî na inya gucutuîkia.
Wana kinya mûnene ûmwega akaariganîria
13 Na kaaba kwîgua ûrî mwana ûmwîthî nkîa nkûrûki ya kwîgua ûrî mûnene ûmûkûrû ûmûriitu, ûra atathikagîîria mataaro. 14 N'ûntû mwana ta ûyu mwîthî nwa aume nceera akathi ûneneeni, wana wegua aciarîrîîtwe ûkîani. 15 I ndaithîîrîîtie antû bonthe bara batwîre nthîgûrû îno, na ndoona bathiingatîîte mwana ûmwîthî ûra akaathûkia kaanya ka mûnene. 16 Bara baamûthiingatîîte bataarî kîthimi. Îndî bara bakaaya nyuma yake batimûkeneera. Na mma wana bûbu i bwa mana. I ta kwîngana na ruuo.