Kuthûka Ngai
5
1 Menyagîîra rîra ûthiîte Nyomba ya Ngai. Wana kaaba ûkathi kûrutanwa nkûrûki ya kûruta igongwana bûra antû bara biaa barûthaga, n'ûntû bo batiiyî kana n'ûthûûku bakûrûtha. 2 Thûgaanagia mbere ya kwaria, na ûtikaagîe mpwî cia kwaria mbere ya Ngai. Arî îgûrû naawe ûrî nthîgûrû. Kwoogu mîgambo yaku îîgue îrî îmîkai. 3 Kwîmakîra kwingî kûreetaga irooto, na rwaria rwingî rûtûmaga muntû aaria waa.4 Kwoogu waiga wîrane na Ngai, buûyûrie na mpwî bûra gûkûûmbîka. Atikenagîîra biaa. Ûyûria wîrane bûra waiga na Ngai.
5 Kaaba gûkara ûtaigîîte wîrane buru, nkûrûki ya kûbuaiga na kûrega kûbuingia. 6 Ûtikaareke mîgambo yaku wengwa îgûtongoreeria wîyiani, kaingo ûûya kwîra mûthînjîri wa Ngai atî tibu waugaga. I mbi n'ûntû ûgaatûma Ngai athûûra i woû? I mbi n'ûntû ûkaareka eenyangia kîra ûrutîrîte ngûgî? 7 Irooto biingî na biugo bitarî mûthia, i bia mana, kwoogu kuthûka Ngai.
Ûtonga i bwa mana
8 Ûtikaarigare wona nkîa ikiinyîîrua na kûrega gûtuîrwa îgamba na ûmma, kana kûrega kûrûthîrwa bûra kûbabatîîrue. Mûnene wonthe araithagîrwa n'ûra arî îgûrû rîake, na bonthe nabo bakaraithîrwa i bara banene kîrî bo. 9 Antû bonthe beerîgagîîra kuuma makethaani wana kinya mûnene ateethekaga kuumania na maketha ma mînda înu yonthe.
10 Ûra wendeete mbia, atikooro aganîrwa; kinya ûra wendeete ûtonga atiiganîrwa i bu. Kinya bûbu nabu nwa bwa mana.
11 Wa bûra ûgaatonga bûgana nwabu ûkeegua ûrî na tûnyua twingî twa kûrera. Kîra wîgagua kîrî oogo, nwa wîkenagia meetho wabuona atî ûrî ûmûtongu.
12 Mûruti wa ngûgî cia inya n'eegagua arî na toro îmbega, arî kana atarî na biakûrîa bia kûgana, îndî itonga bio, biîgagua birî na into biingî bira bitûmaga biraara bitarî toro.
13 Kûrî na ûntû bûngî bûûthûûku mboneete nthîgûrû îno; muntû eebaigagîra ûtonga bûkamûretera kîeba, 14 bunthe bûkaûrîra mîting'ooni na akîrigia na kwîgua atarî na gîntû gîa gûtigîra mwana wake. 15 Muntû aumaga nthîgûrû îno atarî nwa mbi wa bûra aumire nda ya gina. Wa amwe na kûruta ngûgî gwake kunthe gûtirî kîo aûmba kûthi nakîo. 16 Wana bûbu nabu nwa ûthûûku bûûnene mûno! Muntû akaathi wa bûra aayire. Arutaga ngûgî, akîgeragia kûgwata ruuo, rîru i mbi oonaga? 17 Mûtûûrîre wake unthe atûûraga mwinduuni na kîeba, kûmaka, mûthûûro na kwayua.
18 Ûûgû i bu mboneete: atî ûntû bûra bwega aûmba kûrûtha i kûrîa, kûnyua na gûkeneera kîra arutîrîte ngûgî kwa îgiita rîîkai rîra Ngai amwete. Gîkî i kîegwa kuuma kîrî Ngai. 19 Kîrî muntû ûra Ngai eeyaga ûtonga na into na akareka abikeneera, na agatûma ageetîgîîria rûgai rwake na gîkeno n'ûntû bwa kîra arutîrîte ngûgî, gîku i kîegwa kuuma kîrî Ngai. 20 N'ûntû atiimakîra ntugû cia ûtûûro bwake, n'ûntû Ngai atûmaga nkoro yake îkara yûûyûrîîtwe i gîkeno.