6
1 Kûrî na ûthûûku bûngî mboneete nthîgûrû îno, na i mûrigo ûmûnene kîrî antû. 2 Ngai eeyaga muntû ûtonga, gîtîîyo na into, îî, gîntû kîonthe kîra eendaga, îndî atareke abikeneera. Muntû mûgeni n'we abikenagîîra bantû aake. Bûbû i bwa mana na i bûûthûûku.3 Muntû nwa eegue arî na aana baingîa na agatûûra kagiita kaaraaya, îndî wana wegua atûûrîîte îgiita rîraayîîte ata, akaaya kwîgua ationa rûgai rwa gîkeno na atiithikwa bwega, nwa mbuge wana kauno i keega. 4 N'ûntû kûûya gwako wîgua kûrî kwa mana, gûkaathirîra mwinduuni na riîtwa rîako rîtiimenyekana. 5 Wana wegua gationa riûa kana kamenya bûra mûtûûrîre ûkari, ikanogokeete nkûrûki ya muntû ta ûyu. 6 N'ûntû Muntû ta ûyu wana agatûûra mîanka ngiri ciîrî îndî atakeneere ûtûûro bwake, i bûmwe na kauno gaku n'ûntû bonthe bakaathi îrinyaani.
7 Muntû arutaga ngûgî ciake cionthe agîceria gîa kûrîa, îndî atiganagîrwa. 8 Muntû ûmûûgî acindîîte kîaa na mbi? Kûrî kîo nkîa yoongagîîra n'ûntû bwa kûmenya kûrûtha mantû bwega akîonwa i bara bangî? 9 Keneera kîra ûrî nakîo bantû a kwîrirîria kîra ûtarî nakîo. Gûkara ûkîîriragîria i kwa mana. Nwa ta kwîngana na ruuo.
10 Mantû monthe mara marî oogo, i maiyîkeene kuuma tene. Na i kwiyîkeene muntû n'we ûû na atiûmba gûkararania na ûra arî na inya nkûrûki yake. 11 Rwaria rwingî, i rwa mana. I baita mbi rûreetaga? 12 N'ûû wiyî kîra kîega ûtûûrooni bwa muntû, kagiitaani gaakai na ka mana kara gakûrûkaga ta ruuo? N'ûû ûûmba kûmenya bûra gûgaakarîka nthîgûrû muntû arîîkia gûkua.