Mathûgaania îgûrû rîa ûtûûro
7
1 Riîtwa rîega i rîkûrûkîîte mîtaa îra înunkaga bwega;na ntugû îra ûgaakua imbega nkûrûki ya ntugû ya gûciarwa.
2 Kaaba kûthi mûciî ûra ûrî na kîrîro
bantû a kûthi ûra ûrî na kîatho kîa îruga;
n'ûntû antû bonthe bagaakua
na bara barî mwoyo i babatîîrue bakara bakîmenyaga ûgu.
3 Kîeba i kîega nkûrûki ya ntheko,
n'ûntû kîeba i gîkûragia ûtombo.
4 Mathûgaania ma muntû ûmûûgî marî gûntû gwa kîeba,
îndî ma kîaa marî gûntû gwa gîkeno.
5 Na kaaba kûgondokerwa i muntû ûmûûgî,
bantû a gûkaathwa i kîaa.
6 Rîra kîaa gîkûtheka,
nwa ta mîîgua îkîthandîka îrî mwankiini.
Ûtiîgagua bûrî na gîtûmi.
7 Kwenania igûtuîkithagia muntû ûmûûgî kîaa.
Na ngukumo, îkathûûkia nkoro.
8 Mûthia wa ûntû bunthe n'ûmwega nkûrûki ya mwanjîîrio wabu.
Kûûmîîria i kwega nkûrûki ya kûrûtha mantû na rwîkumia.
9 Ûtikaathûûrange na mpwî,
n'ûntû mûthûûro i mûruagina wa waa.
10 Ûtikaûrie, “N'ata n'ûntû mantû maarî meega mûno
îgiita rîa tene nkûrûki ya îîndî?”
Ti kîûria gîa kûûrua i muntû ûmûûgî.
11 Ûûme na rûgai i biega.
I bûteethagia antû bonthe bara barî mwoyo.
12 Ûûme i bûkunîkagîra muntû
wa ta bûra mbeca imûkunîkagîra.
Na baita ya ûûme n'yo îno;
atî ûûme i bûtûûragia mwene bu mwoyo.
13 Thûgaania îgûrû rîa bûra Ngai arûthîîte,
n'ata muntû nwa ûrîkû aûmba
gûtaambûrûkia kîra Ngai aûmbîîte gîkoombi?
14 Rîra mantû makûbuîra,
îkena, na rîra thîîna ciaya nacio, ririkana:
Ngai nwa we areetaga gîkeno na thîîna.
Ûtiiyî n'ata kûthiîte gûkarîka kagiita kara kaayîîte.
15 I mboneete mantû monthe ûtûûrooni bwakwa bwa mana: Muntû ûmwagîru nakuuyaga arî mwagîru woogu, na ûngî ûmûthûûku akathi na mbere gûtûûra mwoyo. 16 Kwoogu ûtikaabue mûno kana ûûgîa mûno. I mbi n'ûntû ûkeebûraga wengwa? 17 Îndî ûtikaathûûke mûno kana ûriita. I kî n'ûntû ûgaakua mbere ya îgiita rîaku rîkinya? 18 Kwoogu i bwega kûgwata bûmwe ûtakûrekia bûra bûngî. Îndî bara bakuthûkaga Ngai, bakaûmbana mantûûni mamu monthe marî maîrî.
19 Ûûme ibwîkagîra muntû inya nkûrûki ya aathani îkûmi ba taûni înene!
20 Gûtirî muntû nwomwe nthîgûrû ûmwagîru ûra arûthaga mantû meega na atakûbîtia.
21 Ûtikaathikîîrie bunthe bûra antû baaragia n'ûntû nwa wîgue mûruti ngûgî waku agîkûruma, 22 n'ûntû kinya woû wengwa nûkûmenya nûrumîîte antû bangî maita maingî.
23 I ndaatûmîîre ûûme gûcûnkûûna mantû mama monthe. I ndeerutanîrîtie kûûgîa, îndî ûûme i bwarî kûraaya naani. 24 N'ata muntû nworîkû aûmba kûmenya gîtûmi gîa ûtûûro i kîbi? N'ûntû bûrî ndeeni mûno, na bûûmo mûno kîrî tiû kûmenya.
25 Îndî indeerutanîîrie kûmenya mathûgaania maakwa kîrî ûmenyo, gûcûnkûûna na gûcwa ûûme kaingo nthooma mantû; na kûmenya waa bwa ûthûûku na nkoma cia waa. 26 Indoonire ûntû bûrî ûrûrû nkûrûki ya gîkuû, nwe i mûka ûra akari ta mûtego. Wendo bûra akweyaga bûgaakûgwata ta mûtego. Na akûrigicîria njara ciake igaakûthaîka ta nyororo. Muntû ûra akenagia Ngai akoonoka kuuma kîrî we. Îndî mwîyia akaagwatwa n'we.
27 Yîî, mûtûmîîria auga, ndaamenyire mantû mama mpoora, mpoora wa ngîcwaga macookio. 28 I ndaithîîte macookio mangî îndî gûtirî rîo mboneete. Ndoonire muntû mûrûme ûmwe kuuma kîrî ngiri ûmwagîru, îndî gatîgatîîni ga aka ntoona nwomwe. 29 Bûbû bunthe i bu ndaathooma: atî Ngai aûmbire muntû arî ûmwega, îndî antû baacwa njîra imbiingî cia kwîthûûkia.