8
1 N'ûû ûkari ta muntû ûmûûgî?N'ûû wiyî bûra mantû makari bungwa?
Ûûme i bûtûmaga athekatheka
na bûgaatûma mîkûnjo ya ûthiû îthira.
Athîkîra mûnene
2 Athîkîra bûra mûnene akuuga, n'ûntû nwathiîtiirie kûrûtha bu mbere ya Ngai. 3 Ûtikeende kuuma ara mûnene arî na mpwî, ûtikeende kûgwatanîra na mantû maathûûku. N'ûntû nwa arûthe bûra bunthe akeenda. 4 Mûnene arûthaga mantû na watho, na gûtirî we amûûria kîûria. 5 Bunka muntû aathîkîra mawatho ma mûnene, ationa thîîna, na muntû ûmûûgî namenyaga bûra abatîîrue arûtha na irî abatîîrue kûrûtha bu. 6 N'ûntû kûrî îgiita rîra rîagîrîîte na njîra îra yaagîrîîte ya kûrûtha mantû monthe, kinya wegua thîîna cia antû icibaingîagîîra. 7 Gûtirî we wiyî bûra kûthiîte gûkarîka, na gûtirî muntû wa kûmwîra. 8 Gûtirî we ûûmba kûrigîîria ruuo kana gîkuû. Gûtirî mûcikaarî arûmagua rûûtha kagiita ka ndûa na ûthûûku bûtirûmûkanaga na bara baburûthaga.
Ûthûûku na wagîru
9 Indoonire mama monthe rîra ndaathûgaanagia îgûrû rîa mantû mara marûthagwa nthîgûrû îno, nthîgûrû îra antû bamwe barî na inya na bara barî ruungu rwao bakiinyagîîrua. 10 I mboneete antû baathûûku bakîthikwa na gîtîîyo, nthikooni ciao, îndî antû barî njîraani bacookeete kuuma nthikooni bakathi bakîbagongagîra taûniini ira ciongwa baarûthagîra moothûûku. Bûbu n'ûntû bwa ûtheri.
11 Rîra mabîtia maarega gûkaanûkua na mpwî, antû bathûkagia wana bakathi na mbere kûrûtha mantû maathûûku gûtirî na thîîna. 12 Îndî inkûmenya wana muntû akeeyia maita îgana, na amwe na ûgu agatûûra îgiita rîîraaya, bara bakuthûkaga Ngai bo bakeegua barî beega nkûrûki. 13 Antû bara bathûûku batiitûûra îgiita rîîraaya, kana beegua barî na mîtûûrîre îmîega, n'ûntû batikuthûkaga Ngai. Batiîgua barî na ntugû indaaya i bakaathîga ntugû ciao na batiirîîra ûkûrû.
14 Îndî bûbû nabu i bwa mana. Raitha bûra gûkarîkaga nthîgûrû: magiita mamwe bara baagîru i bo beeyagwa îkaanûkia rîa bara bathûûku, na bara bathûûku nabo bakeewa kîegwa kîa bara baagîru. Ndiuga wana bûbu i bwa mana. 15 Kwoogu inkwona i twagîrîîte twîkenia, n'ûntû gîkeno kîra tûrî nakîo gîonka mûtûûrîreeni ûyû nwa kûrîa na kûnyua na wîkenia twingwa. Nwa tûrûthe mantû mama wa bûra tûkûruta ngûgî ûtûûrooni bûra Ngai atwete nthî îno.