Gîkuû kîîyagîîra bonthe
9
1 I ndaathûgaaniirie nainya îgûrû rîa mantû mama monthe, na ndoona atî Ngai n'wee atongoragia mantû monthe ma antû bara baûgî na baagîru, kinya wendo na rûmena rwao. Gûtirî nwa ûmwe wiyî bûra bûrî mbere. 2 Gûkari ata rî, Antû bonthe bakomanaga na mantû ûntû bûmwe; bara baagîru na bara bathûûku, bara beega na bara imaramari, bara batarî na mûgiro na bara barî na uu, bara barutaga igongwana na bara batarutaga. Muntû ûmwega tika arî na mwanya na mwîyia. Ûra ûnyunyaga muuma n'we twaka arî mwega nkûrûki ya ûra atanyunyaga. 3 Bûbû n'ûthûûku bûra bwonekaga mantûûni monthe nthîgûrû îno: Atî bonthe baayagîîrwa i mpanga îmwe. Antû barî mwoyo, mathûgaania maao maûyûri ûthûûku na kuuma nkoma, na Nyumaani bagakua. 4 Îndî kûrî na wîrîgîîro kîrî muntû ûra atwîre mwoyo wenka. Wa ta bûra kwîragwa, “Na kaaba kurû îrî mwoyo kîrî cimba înkuû!” 5 N'ûntû bara barî mwoyo i baiyî bagaakua, îndî bara bakuû gûtirî bu baiyî. Batirî na kîegwa kîngî, i baariganîîrie. 6 Ûntû bunthe bûra baarûthaga rîra baatwîre mwoyo ta kwendana, kûmenana na kwîganîîrua rûriitho i biathiire. Gûtirî rîo bakooro beegua barî na kaanya ga kûrûtha ûntû nwa bûrîkû bûra bûrûthîkaga nthîgûrû îno.7 Kwoogu îthi na mbere. Îîrîîre irio biaku na wînyuîre ndibei yaku na nkoro îkeneete n'ûntû Ngai nakenagîîra ngûgî ciaku. 8 Îkagîra nguo inthongi na waakage kîongo gîaku maguta. 9 Keneera ûtûûro na mwekûrû waku, ûtûûrooni bûbû bwa ûtheri bûra Ngai akwete, n'ûntû rûru i ru rûgai rwaku ûtûûrooni na kuumania na kûruta ngûgî nainya gwaku kunthe nthîgûrû îno. 10 Bûra bunthe ûkûrûtha, bûrûthe nainya yonthe, n'ûntû rîra ûgaakua, gûtiîgua kûrî na ngûgî kana kûbanga kana ûmenyo kana ûûme.
11 Indoonire ûntû bûngî. Atî ndeeni ya nthîgûrû îno bara baugagia mûno ti rîonthe bacindaga, na bara ncamba ti rîonthe bacindaga ndûani. Kana bara baûgî boona biakûrîa ûtûûrooni rîonthe. Na ti rîonthe bara baiyî mantû mûno batongaga. Na ti rîonthe antû bara barî na ûmenyo bathûkagua barî na gîtûmi. Wa muntû arî na ntugû yake na kaanya yake. 12 Gûtirî we wiyî irî kagiita gaake gagaakinya. N'ûntû wa ta bûra nyoni irîîkagîrua i mûtego warîmwe, na ta bûra makûyû magwatagwa i neeti, nwa ta bu muntû akirimanagua i mantû mamwe maathûûku ateerîgîîrîîte.
Mathûgaania îgûrû rîa ûûme na waa
13 Naka kûrî ûntû bûngî ndoonire, ngerekano îmbega ya bûra ûûme bûthûkagua nthîgûrû îno. 14 I kwarî na gataûni kaniini na gataarî na antû baingî. Mûnene warî na inya mûno akaithûkîra. Agacîgîîria abaangîîte kwomora rûthiingo rwako athûngîra. 15 I kwarî muntû aatûûraga ku aarî nkîa, îndî n'aarî ûmûûgî mûno na n'aûmbire kwonokia taûni înu. Îndî Nyumaani gûtirî we wamûririkana. 16 Kwoogu ndauga ûûme i bwega nkûrûki ya inya. Îndî gûtirî we ûthûgaanagîria nkîa ta muntû ûmûûgî, kana athikîîria bûra yuugaga.
17 Îndî amwe na ûgu, biugo biikindîîru bia muntû ûmûûgî i biega,
nkûrûki ya gîtuma kîa mûtongoria kîaa.
18 Ûûme i bûrûthaga mantû meega nkûrûki ya into bia ndûa,
îndî mwîyia ûmwe n'enyangagia mantû maingî meega.