Mathûgaania na mataaro mangî kuuma kîrî mûtûmîîria
10
1 Wa ta bûra ngi înkuû îtûmaga maguta ma mîtaa manuunka kîrumba,nwa ta bu waa bûûkai bwînyangagia ûûme na gîtîîyo kîa muntû.
2 Nkoro ya muntû ûmûûgî îmûtongoragia kûrûtha mantû meega,
îndî nkoro ya kîaa îgîtongoragia kûrûtha mantû maathûûku.
3 Kîaa wana kîthiîte na njîra kîthiiyaga gîkîonanagia ûriitu bwakîo;
n'ûntû gîtûmaga muntû wonthe amenya atî we i kîaa.
4 Mûnene ûra ûkwathaga akaaya kûthûûra i woû rî, menya uuma ara ûrî;
n'ûntû mabîtia maanene nwa marekerwe n'ûntû bwa kwînyiia.
5 Aaga kûrî ûntû bûngî bûtaagîrîte mboneete nthîgûrû, namo i mabîtia mara mareteetwe i bara baathanaga: 6 Antû bara biaa i bo bapeetwe twanya twa îgûrû îndî itonga bikeewa twa ruungu. 7 I mboneete nkombo itwete mbaraathi îndî antû ba gîtîîyo bathiîte na magûrû ta nkombo.
8 Ûra wînjaga îrinya, nwa agwe ku;
na ûra womora rûthingo, nwa arûmwe i njoka.
9 Wegua wînjaga maiga, nwa makûgwîre magagûkaba,
na waatûra nkû, nwa ûgurarue i cio ûgîciatûra.
10 Ûkeegua kathoka gaaku igaatuu na ûtigûkanoora,
nwa mwanka ûgaatûmîra inya mûno ûgîgatûmîra,
ûûme i bûteethagia muntû kûrûtha mantû bwega.
11 Gûtirî gîtûmi gîa gûkûûra njoka magego yaambire gûkûrûma.
12 Bûra antû baûgî baugaga i bûbaretagîra gîtîîyo,
îndî biaa biînyangagua i mîgambo yabio biongwa.
13 Bianjagîîria na ndwaria cia waa bakarîîkîîria,
na kuuma nkoma ciongwa.
14 Kîaa kîaragia ntheto imbiingî.
Gûtirî we wiyî bûra kûthiîte gûkarîka,
na gûtirî we ûûmba gûtwîra n'ata gûgaakarîka nyuma ya twakua.
15 Kîaa kîrutaga ngûgî mûno mwanka gîkanoga,
gîkariganîrua i njîra ya kûthi mûciî.
16 Thîîna i kîrî nthîgûrû îra mûnene wayo arî mwana ûmwîthî,
na atongoria baayo baraûkagîra marîa rûkîîrî.
17 Îndî nthîgûrû îra îrî na gîkeno n'îra mûnene wayo arî muntû ûrî gîtîîyo,
na atongoria bara barîîyaga îgiita rîra rîagîrîîte,
kaingo bagîa na inya, na ti kaingo batogoona.
18 Muntû akagwatwa n'ûthao mûno, mwanka akaremwa i kwimba nyomba,
n'îkauria, na îgwe ndeeni.
19 Kîatho kîa marîa gîtûmaga ûkena,
na ndibei n'yo îgagûcancamûra,
îndî gûtirî nwa kîmwe wona kîrî bibi ûtarî na mbia.
20 Ûtikaarume mûnene, kinya mathûgaaniani,
na ûtikaaguute gîtonga, kinya ûrî withooni bwa nyomba yaku ya kûraara.
N'ûntû kanyoni muntû nwa gakamate ntûmwa,
gakabairîra gakabeera bûra uugire.