Bûra muntû ûmûûgî arûthaga
11
1 Ithia mbia ciaku biacaaraani cia kûraaya,ana ntugû îmwe ya ino ûkoona baita.
2 Iga ûtonga bwaku gûntû mwanya mwanya,
n'ûntû ûtiiyî i mpanga mbi îgaakûûyîîra nthîgûrû îno.
3 Rîra matu macuuri,
i kuuraga.
Na mbarî weera mûtî ûkaagwa,
ûkaamaama wagu wagwa.
4 Muntû ûra wetagîîra mbura atianda,
na ûra n'we wetagîîra matu atiiketha.
5 Ûtiûmba kûmenya njîra ya ruuo kana kûmenya bûra mwoyo ûmûyerû wanjangagîîria ndeeni ya nda ya mwekûrû kaingo amaatha. Ûgu nwa ta bu ûtaûmba kûmenya ngûgî ya Ngai ûra aûmbîîte into bionthe.
6 Anda mbeû yaku rûkîîrî na ûtigaatîîrîre ûgoro. Ûtiiyî wegua igaakûra cionthe bwega kana n'imwe ikeegua irî mbega kîrî ira ingî.
7 Werû i bwega na n'ûntû bwa gîkeno meetho makîona riûa.
8 Keneera mîanka yonthe îra ûgaatûûra mwoyo. Wana wegua ûgaatûûra îgiita rîîraaya ata, ririkana ûgaatûûra îgiita rîîraaya mwinduuni. Monthe mara makaaya i ma ûtheri.
Mataaro kîrî aana baîthî
9 Aana baaniini, keneeraani wîthî bwenu. Kenaani rîra bûrî baaniini. Rûthaani bûra bûkwenda kûrûtha, na rûthaani meerirîria ma nkoro cienu. Îndî bûririkane Ngai akabûgambithia n'ûntû bwa ûntû bunthe bûra bûkoororûtha.
10 Ûtikaareke ûntû nwa bûrîkû bûkûmakia kana bûkûretera ûrûrû. Ûtiikara ûrî mwana ûmwîthî îgiita rîîraaya mûno.