12
1 Ririkana mûûmbi waku ntugûûni cia wîthî bwaku, mbere ya ntugû cia thîîna itirakinya na mîanka îkinya rîra ûkauga,“Wana gûtirî gîkeno nkwona ûtûûrooni.”
2 Ûmûririkane mbere werû bwa riûa, mweri, na nthata bûkûrimîra, na matu macooka nyuma ya mbura. 3 Rîra njara ciaku, ira ikûrigagîîria, igaatua kwinaina, na magûrû maaku namo, mara marî na inya îîndî, makaathira inya marigooye. Magego maaku makeegua marî maakai ma gûtagunya irio, na meetho maûre matige kwona bwega. 4 Matû maaku makaûra ma kwîgua gîtuma kîrî njîraani. Ûkeegua bûrî nainya kwîgua kîthii gîkîthia kana rwîmbo rûkiinwa, îndî kinya rwîmbo rwa nyoni rûgakwindûkagîria kuuma torooni. 5 Ûgaakuthûkaga gûntû kûra gûûkîîru, na kûthi ûkeegua kûrî ûgwati. Ntundu ciaku ikaagarûka ituîke injerû; ûtiûmba wîkururia, na meerirîria maaku monthe ûkeegua makûthira. Rîru i rîo muntû akaathi îrinyaani, na i rîo gûkeegua kûrî na kîrîro naagu njîraani. 6 Ririkana Ngai waku mbere nyororo ya fetha îtiratuîka, na taa ya thaabu îgwa nthî na îkua; mûkanda wa gûtaa rûûyî kîthimaani ûtuîka, na gîkuru kîa rûûyî gîkua. 7 Rîru i rîo mîîrî yetû îgaacooka tîîriini ya nthî, na mîruke ya mwoyo îgaacooka kîrî Ngai ûra atweere yoo.
8 Mûtûmîîria auga, i bwa mana na i bwa mana. Monthe i ma mana.
Mantû ma kûthirîkîria
9 Mûtûmîîria n'arî ûmûûgî, n'aathiire na mbere akîrutanaga antû bûra aiyî. N'aathoomire njuno na aathima ûmma bwa cio na aatunga na aabanga njuno imbiingî. 10 Mûtûmîîria naageriirie gûcwa mîgambo ya gûkenia, na mîgambo înu aandîkire yarî ya mma.
11 Mîgambo ya antû baûgî îkari ta mîthanju îmînyoorooku îra mûrîîthi atûmagîra kûrîîthia ng'ondu n'yo. Na njuno irî amwe nacio, itûûraga ta mîcumaarî îrî mîringîre mûtîîni yaita. Cianeenkanîîrwe i Mûrîîthi ûmwe. 12 Mwan'wakwa, kûrî na ûntû bûngî ûbatîîrue kûraithîra. Gûtirî mûthia wa kwandîka mabuku, na kûthooma mûno gûgakûthiria inya.