Ûntû na îgiita rîabu
3
1 Ûntû bunthe aaga nthîgûrû bûrî îgiita rîabu,wa kara kagiita na mantû maako.
2 Kûrî kagiita ga gûciarwa na kagiita ga gûkua,
kagiita ga kwanda na kagiita ga gûketha.
3 Kagiita ga kûûraga na kagiita ga kûoria,
kagiita ga kwomoranga na kagiita ga gwaka.
4 Kagiita ga kîeba na kagiita ga gîkeno,
kagiita ga kûrîra ûrî mûkuîre na kagiita ga gûkeneera.
5 Kagiita ga kûnyagaaria maiga na kagiita ga kûmeethîrania,
kagiita ga gûkumbata na wendo na kagiita gatarî ga gûkumbata.
6 Kagiita ga gûceria na kagiita gatarî ga gûceria,
kagiita ga kwaiga na kagiita ga gûta.
7 Kagiita ga gûtembûranga na kagiita ga gûtuma,
kagiita ga gûkira na kagiita ga kwaria.
8 Kagiita ga kwendana na kagiita ga kûmenana,
kagiita ka ndûa na kagiita ka thîîrî.
Ngûgî îra Ngai aneenkereete antû
9 I mbi muntû oonaga kuumania na kûruta ngûgî gwake nainya? 10 I mboneete ngûgî îra Ngai aneenkereete antû baruta. 11 N'aigîîte îgiita rîra rîagîrîîte rîa mantû monthe. N'aigîîte ûntû bûtakîthira rî kana rî nkorooni ya muntû, îndî amwe na ûgu, muntû atiûmba kûmenya cwe bûra Ngai arûthaga. 12 Inkûmenya gûtirî wega bwa antû nkûrûki ya gûkena na kûrûtha mantû meega rîra barî mwoyo. 13 Kinya gîku i kîegwa kuuma kîrî Ngai atî, muntû wonthe abatîîrue arîe na anyue, na aganîrwe kuumania na ngûgî îra arutîîte.
14 Imbiyî ûntû bunthe bûra Ngai arûthaga bûgaatûûra tene na tene. Ûtiongeera kana ûruta nwambi kuuma kîrî bu. Na Ngai arûthaga ûgu kaingo antû bamûkuthûka. 15 Bûra bunthe bûkarîkaga kana bûgaakarîka i bwarî bûgûtuîkîka mbere. Ngai atûmaga ûntû bûmwe bûtuîkîka kaîrî na kaîrî.
I Ngai wiyî bûra gûgaakarîka Nyumaani
16 Na bûngî nabu kaîrî, i menyeete nthîgûrû îno, wonaga ûthûûku ara ûmma na wagîru bwagîrîîte kwîgua bûrî. 17 Ndeebîîra, “Ngai agaatuîra wagîru na ûthûûku îgamba, n'ûntû wa bûra ûntû bûgaakarîka îgiita rîabu rîongwa.”
18 Ndaarîkîîria na kuuga Ngai nakûgeria antû, aboonia batirî mûkûûrani na nyamû. 19 Wana ûthûûku bûra bweeteerete nyamû na antû i bûmwe. Ikuuyaga bûmwe. Bionthe birî na mîruke bûmwe. Muntû tika arî baita nkûrûki ya nyamû. Mantû monthe i ma mana. 20 Bikaathi bantû amwe bionthe. Bio birî biîrî biaumire tîîriini; na bigacooka wa oogo. 21 N'ûû ûûmba kûmenya wegua mwoyo wa muntû ûthiiyaga bwa îgûrû îndî wa nyamû ûkathi bwa nthî?
22 Kwoogu ndaaya kûmenya ûntû bûra bwega muntû aûmba kûrûtha i gûkeneera bira arutîrîte ngûgî n'ûntû i ru rûgai rwake. Gûtirî bûngî muntû aûmba kûrûtha. Gûtirî bu aûmba kûmenya bûra gûgaakarîka aarîîkia gûkua.