Gîkeno i kîa mana
2
1 Ndaabanga wîkenia na gûcwa kûmenya gîkeno i mbi. Îndî ndoona atî wana bûbû i bwa mana kinya bu. 2 Ndaaya kwona ntheko i waa, wana kinya gîkeno gûtirî bu gîkûrûthagîra. 3 Wa ntongoreetue i kwenda ûûme, i ndaathûgaaniirie wîkenia na ndibei na wîtombeka waani. I ndeendire kûmenya i njîra îrîkû mbega mûno antû batûmîra n'yo kagiita kaao gaakubî aaga nthîgûrû.4 I ndaarûthire mantû maanene; Ndeebakîra nyomba na ndaanda mînda ya mîcabiibû. 5 Ndeerûthîra mînda na ndaanda mîtî ya matunda ma mîthemba yonthe. 6 Ndeenja maria ma kûmîtûûrîria rûûyî. 7 Ndaagûra nkombo imbingî, na kûrî nkombo ingî ciaciaragîrwa mûciî wakwa. I ndaarî na nyamû cia ndîîthia imbingî nkûrûki ya anene bonthe bara baatwîre Njerusaremu mbere yakwa. 8 Kinya i ndeebîthîranîîrie thaabu na fetha kuuma ûtongaani bwa anene ba nthîgûrû ira ndaathaga. I ndaarî na antû arûme na aka bara baambinagîra n'ûntû bwa gûnkenia, na i ndaarî na aka bonthe bara muntû mûrûme aûmba kwenda.
9 Na kwoogu i ndaarî ûmûnene, na ûmûnene nkûrûki ya mûnene wonthe aaro atûûra Njerusaremu, na ûûme bwakwa nwa ndaarî nabu. 10 Kîra kîonthe ndeendaga i ndoonaga. Nteeperia gîkeno nwa kîrîkû. Indaakenagîra ngûgî îra ndaarutîîte na mamu monthe maarî kîegwa gîakwa. 11 Rîru ndacooka ndaathûgaania îgûrû rîa monthe mara ndaarûthîîte na bûra ndaarutîîte ngûgî na inya bûgana nkîmarûtha, na ndaamenya bûtaarî na gîtûmi nwa kîrîkû. I ta kwîngana na ruuo na bûtirî na baita nwa aniini.
Ûûme na waa i bia mana
12 Ndaambîîria kûthûgaania îgûrû rîa ûûme kana kuuma nkoma kana waa. Ndoona gûtirî bu mûnene aaya arûtha ûntû bûûgeni bûra bûtaarûthwa n'ûra aarî mbere yake. 13 Ndoona ûûme i bu bûrî na baita nkûrûki ya waa, wa ta bûra werû bûrî bwega nkûrûki ya mwindu.
14 N'ûntû muntû ûmûûgî noonaga naara athiîte,
îndî kîa kîthiiyagîra mwinduuni.
Îndî ndaaya kwona atî wana muntû ûmûûgî, wana kîaa bakaathi njîra îmwe. 15 Bonthe i bakuuyaga. Wa bûra kîaa gîgaakua nwabu na niû ngaakua. Îîndî baita ya ûûme bwakwa bunthe rî n'îrîkû? Ndaacooka ndeebîîra, “Gûtirî yoo!” 16 N'ûntû muntû ûmûûgî na kîaa bonthe i bakuuyaga, na Nyumanyumaani bonthe bakaariganîria. Aabu î, n'ata muntû ûmûûme aûmba gûkuuyanga ûgu ta kîa.
Gûtiira muuru i kwa mana
17 Kwoogu ndaamena ûtûûro, n'ûntû ngûgî îra îrutagwa aaga nthîgûrû n'ya kûûnyamaaria. Yonthe n'ya mana na i ta kwîngana na ruuo. 18 I ndaamenire kûruta ngûgî kûra kunthe ndaarutîîte aaga nthîgûrû, n'ûntû nwa mwanka ntigîre muntû ûra akaaya nyuma yakwa bionthe bira ndaacwaga. 19 Na n'ûû ûkûmenya wegua akeegua arî mûûme kana ûmûriitu? Îndî amwe na ûgu nwa we akeegua arî na watho îgûrû rîa ngûgî îra yonthe ndutîîte, na bira bionthe mboneete kuumania na ûûme bwakwa aaga nthîgûrû. Wana bûbu nabu, i bwa mana. 20 Kwoogu ndaakua nkoro i kûruta ngûgî kwa inya kunthe kûra ndaarutîîte aaga nthîgûrû. 21 Nkaruta ngûgî n'ûntû bwa gîntû na ûûme bwakwa bunthe, na ûmenyo, na waara îndî ngatigîra muntû ûngî ûra atakîthithinîrîîte, wana bûbu i bwa mana, na bûtiagîrîte! 22 Îîndî i mbi muntû oonaga kuumania na kwînyamaaria na kûruta ngûgî ciake cionthe cia inya aaga nthîgûrû? 23 Ntugû ciake cionthe ngûgî yake n'ya kîeba na ûrûrû; wana kinya ûtugû mathûgaania maake matinogokaga. Na bûbû nwa bwa mana.
I Ngai weyanaga gîkeno
24 Gûtirî bûngî muntû arûtha bwega nkûrûki ya kûrîa na kûnyua na gûcwa kûganîrwa ngûgîîni yake. Wana bûbû nabu, inkwona i kîegwa kuuma kîrî Ngai, 25 n'ûntû, tatiga kuumania n'we n'ûû ûûmba kûrîa na ageekenia? 26 Ngai aneenkanagîra ûûme, ûmenyo na gîkeno kîrî muntû ûra amûkenagia. Îndî kîrî mwîyia eeyanaga ngûgî ya kwîthîrania ûtonga na kwaiga bwa kûnenkera ûra akenagia Ngai. Wana bûbû nwa bwa mana, i ta kwîngana na ruuo.