MÛTÛMÎÎRIA
Mantû monthe i ma mana
1
1 Îno i mîgambo ya Mûtûmîîria, mwana wa Ndaundi na mûnene wa Isiraeri ûra aathanaga arî Njerusaremu.2 “I ma mana! I ma mana!”
I bu mûtûmîîria akuuga.
“Monthe i ma mana!
Mantû monthe i ma mana.”
3 I mbi antû boonaga
kuumania na ngûgî ciao aaga nthîgûrû?
4 Nciarwa ciiyaga igakûrûka,
îndî nthîgûrû îkaraga wa bûra îtûûraga.
5 Riûa riumaga, na rîkathûa,
na rîgacooka na rwîro naara riumagîîra.
6 Ruuo naru rûbuutanaga rûkathi bwa iti,
na rûkaûndûka rûkathi bwa îgûrû,
rûkathiûrûûka naaga na naara,
na rûgacooka naara rûkuumîîte.
7 Miuro yonthe îîndamaga îriani,
îndî îria rîtiûyûraga,
naara miuro yuumaga,
îgacooka noogo kaîrî.
8 Mantû monthe marî mînoga,
nkûrûki ya bûra muntû aûmba kuuga;
Riitho rîtiganagia kwona,
kana gûtû kûgania kwîgua.
9 Mara maarî oogo nwa mo ûkeegua marî oogo kaîrî,
mara maarûthirwe nwa mo makaarûthwa;
gûtirî ûntû bûûyerû,
gûtirî aaga ruungu rwa riûa.
10 Ga kûrî ûntû nwa bûrîkû bûra muntû aûmba kuuga,
“Raitha! Bûbû n'ûntû bûûyerû?”
I bwarî oogo tene mûno,
i bwarî oogo wana mbere tûciarwa!
11 Gûtirî we ûririkanaga
bûra gwakarîkire ntugûûni ira ciakûrûkire,
na gûtirî we ntugûûni ira ikaaya,
akaaririkana bûra gûgûkarîka îîndî.
Ûûme i bwa mana
12 Niû mûtûmîîria, ndaarî mûnene wa Isiraeri ndeeni ya Njerusaremu. 13 Indeerutanîîrie kûthooma na gûcûnkûûna na ûûme mara monthe matuîkîkaga aaga nthîgûrû. I mûrigo ûmûrito ata Ngai aanenkeere antû? 14 I mboneete monthe mara makûrûthwa nthîgûrû îno, na ga nkûbwîra monthe i ma mana. I ta kwîngana na ruuo.
15 Ûtiûmba gûtambûrûkia kîra gîkombaru,
na ûtiûmba gûtara into bira bitarî oogo.
16 Ndeebîîra ningwa, “Ngûtuîka muntû ûmûnene, ûmûûgî mûno nkûrûki ya muntû ûngî ûra aaro athana Njerusaremu mbere yakwa. Imbiyî bwega ûûme na ûmenyo i mbi.” 17 Indeerutanîîrie kûthooma mwanya wa ûmenyo na waa, ûûme na kuuma nkoma. Îndî ndoona gûkû naku nwa ta kwîngana na ruuo.
18 N'ûntû wa bûra ûkeegua ûrî na ûûgî bûgana, n'wabu ûkeegua ûrî na imako bigana,
wa bûra ûkoongeera ûmenyo n'wabu ûkoongeera kîeba.