Njuno cia mûnene Remueri
31
1 Njuno cia mûnene Remueri ira aarutanirwe i gina.2 “Arî mwana wakwa,
arî mwana wa nnda yakwa,
arî mwana wa mîthiîtio yakwa,
3 Ûtikeethirie inya na aka,
kana ûnenkanîra into biaku kîrî bara bathiragia anene.
4 Remueri, ti bwega anene kûnyunyaga ncoobi,
kana aathani kwîrirîîria into bira bitogoonagia.
5 Batikaaye kûnyua bariganîrua i mawatho,
barega kûgiitîra bara bainyîîrîtue magamba bwega.
6 Kundia bara baûrîîte ncoobi,
na muntû ûra ûkûnyamaara ûmûkundie ndibei.
7 Banyue bariganîrue n'ûkîa bwao,
na batiiririkana kînyamaara kîao kaîrî.
8 Aria n'ûntû bwa bara batakûûmba kwîbarîria,
ûtheteere ntigwa cionthe.
9 Aria n'ûntû bwao na ûbagiitîre îgamba na ûmma,
ûtheteere nkîa na bara barî na ûbatu.”
Mwekûrû ûmwega
10 Mwekûrû ûmwega n'ûû aûmba kûmwona?
N'ûntû ûgûri bwake i nkûrûki ya maiga ma goro.
11 Nkoro ya mwene n'îmwîtîgagia,
na gûtirî rîo aagaga baita.
12 Amûrûthagîra mantû meega matheri na gûtirî rîo amûrûthagîra ûthûûku
ntugû cionthe cia ûtûûro bwake.
13 Aceragia guaya na gatani,
na akaruta ngûgî na njara ciake na arî na wîru mûno.
14 We akari ta meeri ya biacaara,
n'ûntû athûgûraga biakûrîa biake kuuma kûûraaya.
15 Aûkagîîra rûkîîrî gacaitîrî,
akathuuranîra mûciî wake biakûrîa,
na akagaîra aruti ngûgî baake ngûgî.
16 Abangagîra kîthaka, na agakîgûra,
na akaanda mûnda wa mîcabiibû na njara ciake wengwa.
17 Eekundîkaga inya ta mûcibi kauna,
na ageekîra njara ciake inya.
18 N'onaga ngûgî ya njara ciake îrî na baita,
na taa yake îtioraga ûtugû bunthe.
19 N'agwataga mûtambo wa gwokotha ndigi na njara ciake,
na akaringithia mûtambo wa gûtuma nguo na njara ciake.
20 N'ateethagia nkîa,
na bara barî na ûbatu.
21 Antû ba mûciî wake batikuthûkaga mpîo,
n'ûntû antû ba mûciî wake bonthe beekagîra nguo intuune.
22 N'etumagîra nguo ciake cia ûrîrî,
nguo ciake ira eekagîra i cia gatani îra nthongi ya rangi ya ûkûyû.
23 Mûkûrû wake n'atîîyîîtwe taûni yonthe,
rîra akari amwe na akûrû bara baangî ba nthîgûrû yao.
24 Mwekûrû ûyû atumaga nguo cia gatani na agaciendia,
kinya akairîra abiacaara mîcibi.
25 Inya na gîtîîyo i cio nguo ciake,
na n'athekagîîra kagiita kara kaayîîte.
26 Atumûraga kanyua gaake akaaria mantû ma ûûme,
na rûrîme rwake rûrî ûrutani bwa kîao.
27 N'amenyagîîra mantû ma antû ba mûciî wake bwega,
na atirîîyaga biakûrîa bia ûthao.
28 Aana baake baûkagîîra bakamwîta ûmûthaarime,
mûkûrû wake n'we akamûkumagia akiugaga,
29 “Eekûrû baingî i barûthîîte bwega,
îndî woû ûbakûrûkîîte bonthe.”
30 Kwendanîîra i kwenanagia,
na ûthongi i bwa ûtheri,
îndî mwekûrû ûra atîîyaga Mwathani n'we akumagua.
31 Mûnenkere kîewa kîa ngûgî ya njara ciake,
na ka ngûgî ciake imûkumithie taûni yonthe.