Njuno cia Aguri
30
1 Ino i cio njuno cia Aguri mwana wa Njake, mataaro mama i mo muntû ûyû eere Ithieri, îî Ithieri na Ukari.a2 “I mma ndî ûmûriitu mûno ntikari ta muntû,
ntirî na gûciûkîrwa gwa kî ûmuntû.
3 Ntiîrutanîîte ûûme,
kana ngîta ûmenyo bwa Ûra Mûtheru.
4 N'ûû wetia îgûrû na aacooka aaga nthîgûrû?
N'ûû wagwata ruuo na njara?
N'ûû aathaîka rûûyî na nguo?
N'ûû eekîîre mîanka yonthe ya nthîgûrû?
We eetagwa ata? Na mwana wake eetagwa ata?
Mbîîra wegua n'ûmwiyî!
5 Kiugo kîonthe kîa Ngai i kîa ûmma;
we i rong'o kîrî bonthe bara beebithaga kîrî we.
6 Ûtikoongeere ûntû biugooni bibu biake,
aaya gûkûgondokera wonekana ûrî mûûrongo.
7 Kûrî mantû maîrî ngûkûromba,
na ûtikaandegeere mo mbere ntirakua:
8 Ûndutarutîre kûrega gwîtîgîka na ûrongo akubî naani;
Ûtigampe ûkîa kana ûtonga;
Nderaga na biakûrîa bira bimbateerie.
9 Ntikaaye kûbaa mûno ngûkaana,
nkiugaga, ‘Mwathani n'we ûû?’
Kana ntuîka nkîa mûno mbiya,
ndumithia riîtwa rîa Mwathani.
10 Ûtikaaguute nkombo kîrî mwene yoo,
îtikaaye gûkûruma na ûûya gûtuîka ûrî na mabîtia.
11 Kûrî bo barumaga beethe,
na kinya batithaarimaga bagina.
12 Kûrî antû beebonaga bongwa barî baatheru,
amwe na ûgu ti bathambie rûko rwao.
13 Kûrî na antû barî wîkumia bwingî mûno,
babûthagia gîntû kîonthe kîra baroona.
14 Kûrî bo barî na magego makari ta mpiû,
na mangî ta tûyiû
kaingo bathiria nkîa îthira nthîgûrû;
na bara barî na moobatu baumauma gatîgatî ga antû.
15 Ntherekeria îrî na aarî baîrî nabo bakaraga bakiugaga, ‘Nenkera, nenkera.’
Kûrî na into bithatû bitabaaga,
na bina bitaugaga ‘Nkûgania!’
16 Nthiko,
nnda ya mûka nthaata,
nthîgûrû îra îtaganagia rûûyî,
na mwanki ûra ûtaugaga ‘Nkûgania.’
17 Muntû ûra abûthagîîria îthe,
na akameneeria na kûrega kwathîkîra gina,
meetho maake magaakûûrwa i nkûngûrû cia naagu kîbondeeni
na kûrîîwa i nderi.
18 Kûrî na mantû mathatû mandigaragia mûno,
na mana ntameereagwa,
19 njîra ya ndiiû ruuoni,
njîra ya njoka rwaraani rwa iiga,
njîra ya meeri rûûyîîni
na njîra ya muntû mûrûme na mûka.
20 Ûyû nuu mûtugo wa mûka mûmaraaya,
arîîyaga akagiria ntau,
rîru akauga ‘Gûtirî ûthûûku ndararûtha.’
21 Nthîgûrû yinainaga n'ûntû bwa mantû mathatû,
yîî, n'ûntû bwa mantû mana mara îtaûmba kûûmîîria.
22 Nkombo îgatuîka mûnene;
na kîaa gîkûbaa;
23 Mûka atarî mwende ûmûgûre,
na nkombo ya mûka îtuîkîîte mûrîokua wa mwathi waayo.
24 Kûrî na biûmbe bina biniini mûno nthîgûrû îno
îndî birî ûûme mûno.
25 Nthûûti i tûnyamû tûtarî na inya,
îndî i twîbaigagîra biakûrîa kagiita kara kûrî na yûûra.
26 Manyore i tûnyamû tûtarî inya,
îndî i twîrûthagîra ûtûûro bwa tu njaraani cia maiga.
27 Ngige, itirî mûnene,
îndî ithiiyaga irî amwe ikundi ikundi.
28 Nkou, nwa ûmîgwate na njara,
amwe na ûgu n'îthûngagîra nyomba ya mûnene.
29 Kûrî na into bithatû birî na mûthiîre ûkenagia,
îî, into bina birî mûkinyîre ûmwega.
30 Cimba, n'yo nyamû îra îrî inya nkûrûki ya nyamû îra iingî cionthe;
na îtikuthûkaga nyamû îîngî nwa îrîkû;
31 Ncamba ya ngûkû îkinyîîte nthî na wîkumia,
kana nthenge ya mbuga,
kana mûnene arî mbere ya antû baake.
32 Wegua n'ûrûthîîte waa webûkîîria,
kana n'ûrabangaga mûbango ûtarî mwega,
kunîkîra kanyua gaaku na njara.
33 Kûthuka îria i gûtûmaga riuma maguta,
na kûringa nyiûrû gûgatûma nthakame yuuma,
nwabu kwîngîîra bitina gûtûmaga yiimba.”