SABUURI
Mantû ma îbuku rîrî
Îbuku rîrî rîa Sabuuri na riîtwa rîngî rîîtawa, “Îbuku rîa nyîmbo na maromba.” Nyîmbo ino amwe na maromba ciatungirwe na ciandîkwa kagiita karaaya mûno n'aandîki mwanya mwanya Ndaundi arî ûmwe wao. Antû ba Isiraeri i baaciîthîraniirie amwe na baatua gûcitûmagîra kûgonga Ngai ikomanooni biao na nyumaani baituîkithia gîcuncî kîmwe kîa maandîko maatheru.
Sabuuri ino i cia mîthemba îmiingî n'ûntû i cia gûtûmîka magiita mwanya mwanya ma kûgonga Ngai. Kûrî na nyîmbo cia gûkumia Ngai, Maromba ma ûteethio, ûkaria na kinya wonokio. Wana kinya kûrî na maromba ma kûromba ûrekeri na nyîmbo cia gûcookia nkaatho kîrî Ngai n'ûntû bwa ithaarimo biake bira atûthaarimîîte na bio, na kinya maromba ma kûromba Ngai athirie anthû. Kûrî na kinya maromba ma muntû wengwa mara makwonania moobatu ma muntû wengwa na mantû mangî ma nkoro ndeeni. Na kinya kûrî na maromba ma mwingî ma kûmenyithania moobatu na wendi bwa antû bonthe kîrî Ngai.
Rîra Mwathani Yiesû aatûûraga gûkû nthîgûrû, n'aaragia agîtûmagîra biugo bia îbuku rîrî rîa Sabuuri. Kinya aandîki ba Kîrîîkanîro kîra Kîyerû i bagweteete biugo bimwe bia Sabuuri mabukuuni maao.
Kwoogu Îbuku rîrî rîa Sabuuri i rîa gîtûmi mûno kîrî eetîgîri mantûûni monthe ma kûgonga Ngai.
Îbuku rîrî rîa Sabuuri rîgaanîîtue icuncî bitaano:
1. Îbuku rîa mbere: Sabuuri 1-41,
2. Îbuku rîa maîrî: Sabuuri 42-72,
3. Îbuku rîa Mathatû: Sabuuri 73-89,
4. Îbuku rîa Mana: Sabuuri 90-106,
5. Îbuku rîa Mataano: Sabuuri 107-150.