ÎBUKU RÎA MAÎRÎ
Sabu 42-72
Kûromba Ngai kagiita ka thîîna
Kîrî mûtongoria wa wini. Sabuuri ya aana ba Kora.
42
1 Wa ta bûra nthwariga yîîriragîîria rûûyî rwa tuuro,nwabu nkoro yakwa îkwîriragîîria, woû Ngai.
2 Nkoro yakwa n'îgagua îrî na bûûta ya mantû ma Ngai, Ngai ûra atûûraga mwoyo.
I rî nkaaya kûgonga mbere yaku?
3 Ndîraga mûthenya na ûtugû,
irio biakwa nwa meethori mamu maakwa
anthû baakwa rîonthe banyûrûntaga bakîmbûûragia ata rî,
“I ka Ngai ûyu waku arîkû?”
4 I nkuuyaga nkoro,
ndaririkana mantû mama,
bûra ndaathiyaga Nyomba ya Ngai amwe na kîrîndî gîa antû,
na ngîtongorereetie,
tûkiinaga nainya nyîmbo cia gûcookia nkaatho kîrî Ngai,
gîkundi gîa antû bagîkûngwîra barî na nkena.
5 I mbi n'ûntû nkuîte nkoro?
I mbi n'ûntû ntangîkîîte ûgu?
Nkaiga wîrîgîîro bwakwa kîrî Ngai!
Na nkamûkumia kaîrî
mwonokia wakwa na
6 Ngai wakwa.
Nkoro yakwa n'inyîîrîkîîte ndeeni mûno.
Kwoogu i ngûkûririkana
kuuma nthî ya Njorondani
na kuuma kîrîmaani kîa Erimoni na kîa Misari.
7 Ndia yuugagîîria ndia îra îîngî
rîra ndurumo ciaku ikwarûka,
na mîkumbîîrî yaku yonthe
îgînturûkaga.
8 Mwathani aroonanagia wendo bwake bûra bûtathiraga kûrî mûthenya,
kaingo mwinagîra ûtugû,
ta îromba nkûromba Ngai wa ûtûûro bwakwa.
9 Mbûûragia Ngai, Rwara rwakwa rwa iiga ata rî,
“I mbi n'ûntû ûriganîrîîtue i niû?
I mbi îgaatûma nkara nkîrîraga i kîeba
n'ûntû bwa kwinyîîrua i mûnthû?”
10 I nthontoreetue n'irumi bira,
anthû baakwa bakûûndumanga
bakîmbûûragia ata rî,
“I ka Ngai ûyu waku arîkû?”
11 I mbi n'ûntû nkuîte nkoro?
I mbi n'ûntû ntangîkîîte ûgu?
Nkaiga wîrîgîîro bwakwa kîrî Ngai!
Na nkamûkumia kaîrî
mwonokia wakwa na Ngai wakwa.