Îromba rîa kworua
Kîrî mûtongoria wa wini. Sabuuri rwa Ndaundi.
41
1 Kîthaarimo i kîrî ûra eegagîîrua nkîa kîao!Mwathani akamûteethia îgiita rîa thîîna.
2 Mwathani n'amûmenyagîîra na akamûtûûria mwoyo.
Agaatûma akena arî nthîgûrû,
atimûrekeeria kîrî anthû baake.
3 Mwathani n'amûmenyagîîra arî gîtandaani rîra arî mwayie.
Arî gîtandaani woogu arîmwayie, n'amworagia mîrimo yake yonthe.
4 Naani ndauga, “Itû Mwathani, mbîgîîrua kîao,
mboria, n'ûntû i mbîyîîtie mbere yaku!”
5 Anthû baakwa baambaragia mantû maathûûku, bakîûragia,
“Irî agaakua, na riîtwa rîake rîriganîrie?”
6 Na ûra gûûyaga kûndaitha, aaragia mantû ma ûrongo,
agîcwaga ûthûûku bwakwa nkorooni yake,
kaingo akoona cia kwaria aumagarûka.
7 Bonthe bara baanthwîre, banguutaga na bioye barî amwe,
banthûgaanagîria ûthûûku akî.
8 Baugaga, “Kwayua kûra aayîîtue,
atiûka agu amaami kaîrî.”
9 Kinya mûcoore wakwa wa nkoro ûra ndaretîgîîtie cwe,
ûra tûrarîyanagîra irio amwe n'we,
n'arangarûkire.
10 Îndî Woû Mwathani, mbîgîîrua kîao,
ûmbûkîîrie, kaingo ndîrîîria kîrî bo!
11 Bûbu i bu bûtûmaga mmenya ingûkenagia,
n'ûntû mûnthû wakwa ataûkia nkururo cia gûûntura.
12 N'ûntetheetie, n'ûntû ndûthaga bûra kûbatîîrue,
na wambaiga mbere ya ûthiû bwaku nkaraga oogo tene na tene.
13 Mwathani Ngai wa Isiraeri, arookumua,
kuuma îîndî mwanka tene na tene!
Aameni na kaîrî Aameni.