Rwîmbo rwa gûkumia Mwathani
Kîrî mûtongoria wa wini. Sabuuri ya Ndaundi.
40
1 Ndeeteereete Mwathani, mbûmîîrîîtie,n'we aanthikîîria na eegua kîrîro gîakwa.
2 Aangwata aanduta kuuma îrinyaani rîa thîîna,
aanduta kîthambiini,
aakinyithia mbayo ciakwa rwaraani rwa iiga,
na aatûma magûrû maakwa marika.
3 Eekîra rwîmbo rwaimbia kanyuani gaakwa,
rwîmbo rwa gûkumia Ngai wetû.
Baingî boona ûgu bagaakuthûka,
na beetîgie Mwathani.
4 Kîthaarimo i kîrî muntû ûra
eetîgîîtie Mwathani,
ûra atagwatanagîra na eekumia,
kana bara bagongaga ngai cia ûrongo.
5 Mwathani Ngai wakwa,
n'ûtûrûthîrîte mantû maingî.
Watûthûgaanîria na watûbaangîra mîbango îmingî ya kûrigaria,
gûtirî ûngî ûkari ta woû!
Mbûmba kûmagweta nkauga ûûgû,
“I maingî mûno matitarîka.”
6 Woû ûtikenagua n'igongwana na biewa.
Woû ûtiîtagia igongwana,
bia kûbîîthua kana igongwana n'ûntû bwa wîyia.
Îndî n'wampeere matû ma gûkwîgagua.
7 Rîru ndauga, “I niû ûyû,
mantû maakwa i magweteetwe maandîkooni maatheru.
8 ‘I nkenaga kûrûtha kwenda waku, Woû Ngai wakwa,
watho bwaku bûrî nkorooni yakwa ndeeni.’ ”
9 I ntûmîîrîîtie nkuma îmbega ya wonokio bwaku kîrî antû baaku bonthe Mwathani,
ntikoorotiga kûbeera ûgu,
Woû Mwathani, n'wiyî ûgu bwega.
10 Gûtirî ûntû nwa bûmwe bûkoneetie wonokio ndaakira nabu nkorooni yakwa,
I mbarîîtie mantû magwîtîgîka gwaku na wonokio bwaku.
Gûtirî rîo ndaakirîra kûgweta mantû ma wendo bwaku bûra bûtathiraga na gwîtîgîka gwaku
mbere ya antû baaku bonthe.
11 Naawe Mwathani, ûtikaarigîîrie kîao gîaku gînkinyîra,
reka wendo bwaku bûra bûtathiraga na gwîtîgîka gwaku bindigagîîrie mwanka tene na tene!
Îromba n'ûntû bwa gûcwa ûteethio
(Sabu 70)
12 N'ûntû moothûûku maingî mûno matatarîka
imanthiûrûkîrîîte,
na mabîtia maakwa mangwete maandikia,
mwanka ndaatiga kwona njîra.
I maingî nkûrûki ya ntundu cia kîongo gîakwa,
na nkoro yakwa n'îthirîîte wîrîgîîro.
13 Itû Mwathani îtîgîîria gûntuunyûkia!
Ncû na mpwî, itû Mwathani, ûnteethie!
14 Bara bageragia kûûnduta mwoyo
baroogîa îgi na bakarigicana.
Bara bakenagîîra mathîîna maakwa
baroocookua nyuma na bakagwatwa i nthoni.
15 Bara baanyûrûntaga
baroogîa îgi.
16 Îndî bara bonthe bagûceragia
barookenaga na kûgwîragua ndeeni yaku,
bara beendeete wonokio bwaku
rîonthe ibaugage, “Mwathani n'ûmûnene!”
17 Niû naani, ndî nkîa na gûtirî gîntû gîakwa ndî,
îndî Mwathani n'anthûganagîria.
I woû mûnteethia na mûnkûûri
menya ûkarakara, itû Ngai wakwa.