Muntû arî na thîîna akiumbûra meeyia
Kîrî mûtongoria wa wini, Njenduthuni. Sabuuri ya Ndaundi.
39
1 Ndaugire, “Nkamenyeera mîkarîre yakwa,kaingo ntaaria ûntû bûgaatûma mbîyia,
kana ntumûra kanyua gaakwa mbuga ûntû,
antû bara bathûûku barî akubî.”
2 Ndaakarire ta muntû ataiyî kwaria, ndaakira ki,
ntakwaria kana mbuga ûntû kinya bûra bwega, gûtarî bu nkuuga kinya bûkeegua bûrî ûntû bwega.
Îndî amwe na ûgu, ntateetheka n'waka kînyamaara kîongerekaga.
3 Na ndataangîka mûno nkorooni,
wa ndaathûgaania thîîna îkaimba,
ndaremwa i kwinyîkîria ndaûria na kanyua gaakwa ata rî,
4 “Mwathani ngaatûûra kûnyamaara mwanka rî?
I rî ngaakua?
Mbîîra mmenye ntugû ciakwa n'igana ira itigeere.
5 Raitha wone, ûmpete ntugû cia ûtûûro bwakwa inkai,
na ûtûûro bwakwa i ta gîntû gîtarî ara kîrî mbere yaku.
Na mma ûtûûro bwa muntû wonthe i ta mana.
6 Ûtûûro bwa muntû bûtherekagîria ta kîrundu,
na mma beenogagia ûtheri,
muntû eethîranagia ûtonga, na atiiyî n'ûû akaaburîa.
7 Îîndî Mwathani, i mbi mbeteereete?
Wîrîgîîro bwakwa bûrî kîrî woû.
8 Nkûûra mbuume meeyiani maakwa monthe,
na ûtikaareke biaa biimbûthia.
9 Niû nwaka nkiri, ntigûtumûra kanyua gaakwa,
n'ûntû i woû ûtûmîîte nkara ûgu.
10 Ûtigaankaanûkie nkûrûki ya agu,
îcûnia rîa njara yaku rîkaanthiria.a
11 Ûgondokagîra na ûgakaanûkia muntû n'ûntû bwa wîyia bwake,
wînyangagia into biao bira beendeete mûno ta bûra ndugunye irûthaga
na mma ûtûûro bwa muntû i bwa mana. I ta mîruke.
12 Îgua îromba rîakwa, itû Mwathani,
na ûthikîîrie gûkaya gwakwa.
Ûtigaakunîke matû maaku ûrega kwîgua kîrîro gîakwa!
N'ûntû niû nkari ta mûgeni waku akûrûkîîte,
mûgeni, wata biûyûûyû bietû bionthe.
13 Rekana naani, kaingo ncooka gûkena kaîrî,
mbere ntirakua mbuumauma oogo.”