Îromba rîa mwîyia
Sabuuri ya Ndaundi ya kwerekana.
38
1 Itû Mwathani, ûtikaangondokere ûrî na mûthûûro,kana ûnkaanûkia na marûrû.
2 Mîgwî yaku îmuntîîte îkathirîra,
na inya yaku yambinyîîria mûno.
3 N'ûntû bwa mûthûûro waku, inkwîgua ûrûrû bûnene mûno,
mbayîîtue mwîrî wakwa unthe n'ûntû bwa wîyia bwakwa.
4 Niû mabîtia maakwa i maingî mûno, ndiamîîte ku cibi ta muntû ûûrîîte na rûûyî. Namo, tikûritûa gûku!
Nwa ta mûrigo ûtaûkîîrîka.
5 Ironda biakwa i bikûnuunka woru, na bitikwora,
n'ûntû bwa waa bwakwa.
6 Ndî na ûrûrû bwingî mûno bûtikûreka ndûngama.
Nkaraga nkîrîraga ta muntû akûrîrîra kiimba.
7 Mwîrî wakwa uunthe i mwanki mûtheri,a
mwîrî wakwa uunthe ûrî na thîîna.
8 Ng'ong'eete na ndaathirania buru,
ndî na kînyamaara gîa nkoro, na ngakiia n'ûrûrû.
9 Mwathani, meerirîria maakwa monthe marî kîrî woû,
na gûkaya gwakwa niû ntigûkwitha.
10 Nkoro yakwa n'îkûringa mûno, nkathirîrwa n'inya,
kinya meetho maakwa imaraûrire ndatiga kwona.
11 Acoore na atûûri ibagûûnkuthûka ntikabatereere mûrimo,
kinya antû ba mûciî wetû barîkara aaraaya naani.
12 Bara bacwaga kûûmbûraga baantegagîra mîtego,
bara beendaga kûmbîguithia ûrûrû nabo, rîonthe baaragia mantû ma kûnthiria,
batiindaga kûûmbangîra mantû ma ûrongo mûthenya unthe.
13 Îndî naani nkaraga ta gîpûra, ngakara ta ntakwîgua,
ngakara ta maamu ûra ataûmba gûtumûra kanyua gaake aaria.
14 N'amma, ndaabanga gûkara ta muntû ateegagua,
ûra gûtarî bu acookagia na kanyua gaake.
15 Mwathani, I woû mbeteereete,
n'ûntû woû, Mwathani Ngai wakwa, n'wa woû ûgaancookeria.
16 N'ûntû ndîkûromba ata rî, “Bunka ûtikaareke bakeneera kînyamaara gîakwa,
kana ûreka beekumîria kûgwa gwakwa.”
17 N'ûntû ndî akubî gûkurumana,
n'ûrûrû bûra nkaraga nabu îgiita rîonthe.
18 Inkumbûra ûthûûku bwakwa,
Itû ndekera wîyia bwakwa.
19 Anthû baakwa i baingî na barî na inya,
na baingî i bara bakûûmena gûtarî na gîtûmi.
20 Bara baandeaga wega bûra mbarûthîrîîte na ûthûûku,
i baameneete n'ûntû i ngeragia kûrûtha bwega.
21 Mwathani, ûtigaantiganîrie,
itû Ngai wakwa, ûtigaakare kûraaya naani.
22 Ncû na mpwî ûnteethie,
Itû Mwathani, mwonokia wakwa.