Mûthia wa bara bathûûku na bara beega
Sabuuri ya Ndaundi.
37
1 Ûtikaamake n'ûntû bwa antû bara bathûûku,kana wîgîîrua bara barûthaga mabîtia rûriitho.
2 N'ûntû nyuma ya kagiita gaakai bakaanyaara ta nyaki,
na wa ta bûra matî maririmaga na magacooka makaûrûrûka, n'wabu bagaakara.
3 Îtîgia Mwathani na ûrûthage mantû meega,
kaingo ûtûûra nthîgûrû na ûkeneera mawega maayo.
4 Kenaga ndeeni ya Mwathani,
na agakûûyûrîria meerirîria ma nkoro yaku.
5 Îînenkanîre kîrî Mwathani,
mwîtîgie, na agagûteethia.
6 Agaatûma ûtheru bwaku bûyica ta rûkîîrî gûgîkîa,
ûmma bwaku bûkara ta riûa mûthenya gatî.
7 Ûmîîria na weteere bûra Mwathani akaarûtha,
ûtikaamake i kwona bûra muntû arî na into biingî,
bira oonaga kuumania na mîbango yake îmîthûûku.
8 Îîkanie marûrû, na webane na mûthûûro,
mûthûûro n'ûtûmaga muntû eeyia.
9 N'ûntû bara bathûûku bakaathirua,
îndî bara beerîgagîîra Mwathani bakeewa nthîgûrû înu îrî rûgai rwao.
10 Kagiita gatarî karaaya, bara bathûûku bûtiboona,
wana kinya bwabaceria ikarooni biao, bûtiboona.
11 Îndî bara babooreeru bagaatuîka eene nthîgûrû înu îrî rûgai rwao,
nabo bakeneere ûkiri na mantû meega mara Ngai eeyaga antû baake.
12 Bara bathûûku babangagîra bara baagîru mîbango îmîthûûku,
na bakîbakabakabagîra magego.
13 Îndî Mwathani n'athekagîîra bara bathûûku,
n'ûntû araithaga akoona ntugû yao ya îgamba n'îyîîte.
14 Bara bathûûku bakûûrîîte mpiû
na baatuma nta ciao,
baûraga nkîa na bara barî na ûbatu,
na bang'eera bara barî na mîkarîre îmîega.
15 Îndî Ngai agaatûmîra mpiû cia antû babu bathûûku kûbaûraga nacio
na nta ciao ciunîkaange.
16 I kaaba gantû gaakai ka muntû ûmwagîru,
nkûrûki ya ûtonga bwa antû baingî baathûûku.
17 N'ûntû Mwathani akaathiria inya ya antû bara bathûûku,
îndî bara baagîru akabamenyeera.
18 Mwathani n'amenyagîîra bara bamwathîkagîra,
na rûgai rwao i rwa gûtûûra tene na tene.
19 Batinyamaara magiita ma thîîna,
bakeegagua barî na biakûrîa bia kûgana îgiita rîa yûûra.
20 Îndî bara bathûûku bakaathira,
anthû ba Mwathani bakari ta mwago wa nyaki îmbîthî,
bakaûra kîûngo ta ntoogo ya mûrangi.
21 Bara bathûûku bakoobaga batarîee,
îndî bara baagîru beeyanaga batagûtara.
22 Bara bathaarime i Mwathani, i bo bagaatuîka eene nthîgûrû înu îrî rûgai rwao,
îndî bara barume i Mwathani akabeengatia baume nthîgûrû înu.
23 Mwathani n'we atongoragia muntû njîraani îra athiyagîra,
na agakaria bara bamûkenagia.
24 Kinya agataratara akagwa, atiikara amaami agu nthî,
n'ûntû Mwathani akamûteethia arûûngame.
25 Ndaarî mwana mûnyi na îîndî ndî mûkûrû,
îndî ntoona muntû ûmwagîru atiganîrîtue i Mwathani,
kana aana baake bariûnga bakîrombaga irio.
26 Akaraga akîeyanaga na agîkoobithanagia agwîrîtue,
na aana baake i bathaarime.
27 Tigana na ûthûûku, na ûrûthage bwega,
na ûgatûûra nthîgûrû îno tene na tene.
28 N'ûntû Mwathani n'endete ûntû bûra bwagîru,
atiitiganîria bara bamwîtîgîîtie.
29 Bara baagîru i bo bagaatuîka eene nthîgûrû înu îrî rûgai rwao,
batûûre ku tene na tene.
30 Muntû ûmwagîru aaragia biugo bia ûûme,
na rûrîme rwake rwaragia ûmma.
31 Watho bwa Ngai wake bûrî nkorooni yake,
na n'abuathîkagîra rîonthe.
32 Ûra mûthûûku akaraga agiitîrîîte ûra mwagîru,
agîcwaga njîra cia kûmûûraga.
33 Îndî Mwathani atimûrekeeria aûmbwa n'anthû baake,
kana rîra akûgaambithua areka agiitîrwa îgamba bûthûûku.
34 Etagîîra Mwathani
na ûrûmagîîre njîra ciake,
n'wee agagûûkîîria ûtuîke mwene nthîgûrû înu îrî rûgai rwaku,
na wîbonere bara bathûûku bakîthirua.
35 Ndaroona muntû ûmûthûûku na ataûmîîrîka,
eeneneetie ta mûtî ûmûnene wa kîrîma kîa Rebanoni.
36 Kaîrî ngûcookeera, ataarî oogo,a
ndamûceria, îndî ntaûmba kûmwona.
37 Raitha muntû atarî ûguute, wone muntû ûmwagîru,
mûtûûrîre wake ûkeegua ûrî na kîthaarimo na ûkiri.
38 Îndî eeyia bonthe bakeenyangua,
na nciarwa ciao ithirue cwe.
39 Wonokio bwa bara baagîru buumaga kîrî Mwathani,
n'we wîbitho bwao îgiita rîa thîîna.
40 Mwathani n'we abateethagia
na akabatuunyûkia kîrî bara bathûûku,
n'ûntû beebithaga kîrî we.