Ûthûûku bûra antû barûthaga
Kîrî mûtongoria wa wini. Rwîmbo rwa Ndaundi mûruti ngûgî wa Mwathani.
36
1 Ûremu bwa mwîyia bwaragia n'we nkorooni yake ndeeni,na atikuthûkaga Ngai nwa aniini.
2 N'ûntû we eebenagîîria wengwa akeebîîra,
meeyia maake matikooromenyekana kana mamenwa.
3 Biugo bira biumaga kanyuani gaake i bithûûku na bia ûrongo.
N'atiganîîte na kûrûtha mantû ma ûûme na mara meega.
4 Amaami ûrîrî bwake abaangaga mîbango îmîthûûku,
akeerutanîria kûrû mîbangooni înu mîthûûku,
na gûtirî ûntû bûthûûku areganaga nabu.
5 Wendo bwaku bûra bûtathiraga i bûûnene, bwîtagia bûgakinya kûra îgûrû,
gwîtîgîka gwaku naku gûgakinya matuuni.
6 Wagîru bwaku bûgana ta irîma,
na ûgiiti bwaku bwa magamba ibworokeru ta îria.
Mwathani, i woû ûmenyagîîra antû na nyamû.
7 Mwathani, wendo bwaku bûra bûtathiraga n'ata bûrî bwa gîtûmi!
N'ûntû ûmenyagîîra antû bonthe wa ta bûra ngûkû îkunîkagîra tûcui twayo mathabuuni maayo.
8 Barîîyaga na bakabaa n'ûntû bwa wingî bwa irio bira ûbeeyaga,
ûkabaa rûûyî rwa kûnyua rwa muuro ûra ûkenagîîra.
9 I woû kaumo ka mwoyo,
na werû bwaku i bu bûtûmûrîkagîra.
10 Îthi na mbere kwonania wendo bwaku bûra bûtathiraga kîrî bara bakwiyî,
na bara baagîru ûbarûthagîre mantû meega.
11 Ûtikaareke eekumia bambithûkîra,
kana bara bathûûku baambîîngatia mbugia rwîro.
12 Ta raitha wone bûra antû bara bathûûku bagoomanîîte nthîgûrû,
i baara batungumeene aara batakûûmba gûûkîîra kaîrî.