Îromba n'ûntû bwa gûcwa ûteethio
Sabuuri ya Ndaundi.
35
1 Woû Mwathani, regana na bara bareganaga naani,na ûndwîrîîre kîrî bara barûaga naani!
2 Thûkia rong'o yaku na mîrigo ya ndûa,
ûûye ûntuunyûkie!
3 Thûkia îtumo rîaku amwe na ng'ûûra,
ûrigîîrie bara beenganîîte naani.
Îra nkoro yakwa ata rî,
“I niû wonokio bwaku.”
4 Baroogwatwa i nthoni na bakagîa îgi,
bo bara baanceragia baambûraga!
Baroocookua nyuma bakarimangîria barigiceene,
bo bara bambangagîra mîbango îmîthûûku!
5 Barookara ta maûngû magûrûkîîtue i ruuo!
Wa bûra Mûraîka wa Mwathani abaumîîte nyuma abeengatîîtie.
6 Njîra yao îroogea matenderû na îkaruma mwindu
Mûraîka wa Mwathani n'we arî nyuma abeengatîîtie.
7 Bambaigîîre mûtego wa gûûntega nau,
na baambîînjîra îrinya mbarûka ku bangwata gûtarî na gîtûmi.
8 Kwînyangua kûroobatuîkîîria bataiyî!
Na baroorîkîrua i mûtego wao ûra barantegeete nau,
na baroororomera îrinyaani rîru barî bo bakathira!
9 Rîru i rîo ngaakena ndeeni ya Mwathani,
Ngaakena n'ûntû bwa kûmbonokia.
10 Ngaakumia Mwathani na nkoro yakwa yonthe mbuge,
“Gûtirî ûngî ûkari ta woû.
Woû ûtuunyûkagia bara batarî na inya kuuma kîrî bara barî na inya,
nkîa na bara barî na ûbatu kuuma kîrî bara bakûbainyîîria.”
11 Akûûyî ba ûrongo barîûkîîra,
bagaantuîrîîra mantû ntaiyî.
12 Baandeaga wega bûra mbarûthîrîîte na ûthûûku,
na ûntû ta bûbu bûgatiga bwanthiria mwoyo.
13 Îndî bakwayua, Ndeekîîre mathango,
Ndeeperia kûrîa biakûrîa.
Ndaarombire ndînyiîtie,a
14 taka ndaarîragîra mûcoore wakwa kana mûruayia.
Ndaarîraga mbînîkîîte kîongo nthî,
ta muntû akûrîrîra gina.
15 Îndî niû nkwona thîîna, bonthe i baakenire,
na beethîrana amwe kûnyûrûûnta.
Antû baageni bara ntaamenyaga baakara bakînyûrûtangaga batagûtiga, na bagantuuyagîîra ûrongo batakûmeria mata.
16 Bakari ta antû bataiyî Ngai bakaanyûrûnta na kabûthia kaîrî na kaîrî,
bakîmbombaga na gûnkabakabîra magego.
17 Mwathani, n'ûgaakara ûndaithîrîîtie mwanka rî?
Ntunyûkia mbuume kwînyanguani gûkû,
mbonokia kuuma kîrî anthû baba bambithûkîrîîte ta cimba.
18 Rîru naani ngagûcookeria nkaatho kîûthûranooni kîînene gîa antû baaku,
ngûkumithie mbere ya kîrîndî gîku kîonthe.
19 Ûtikaareke anthû baakwa banthekeera n'ûntû ndî na thîîna,
kana ûreka bara baamenaga woogu mana maatheri,
baunanîra riitho.
20 N'ûntû bo batiaragia na njîra ya ûkiri,
îndî babaangaga mîbango ya kûrongoera,
bara beendeete gûkara na ûkiri.
21 Bambatîkagîria tûnyua twao bakiugagîîria nainya bakauga,
“Tûkwîbonera twingwa na meetho meetû bûra ûrûthîîte!”
22 N'ûntû ûkwîbonera ûûgû Itû Mwathani, ûtigaakire!
Kwoogu Mwathani ûtigaakare aaraaya naani!
23 Ûkîîra, ûrûngame ûndûîrîîre!
Ûngambîîre bûra kûbatîîrue, itû Mwathani, Ngai wakwa.
24 Ntuîra îgamba bûra kûbatîîrue, Woû Mwathani, Ngai wakwa, kûringana na wagîru bwaku,
na ûtikaareke anthû bakeneera gûcindwa gwakwa.
25 Ûtikaareke beebîîra, “Wîrirîria bwa nkoro cietû bûkûûyûra wa bûra bungwa tûrendeete!”
Ûtikaareke bauga, “Tûgûkameria.”
26 Baroogîa îgi na bakarigicana bonthe,
bara bakenagîîra rîra ndî na thîîna!
Antû babu beebûkagîîria ûgu bakîregana naani,
baroogîa îgi na bagacambagua n'antû.
27 Bara beendaga kwona ndûthîrîtwe bûra kûbatîîrue,
barookeneera na kûgwîrua,
na batûûre bakiugaga, “Mwathani n'ûmûnene,
we ûra akenagîîra mawega ma mûruti ngûgî wake.”
28 Rîru naani ngatua kwaragia mantû ma wagîru bwaku,
na ngûkumie mûthenya unthe.