Gûkumia Ngai n'ûntû bwa wega bwake
Sabuuri ya Ndaundi. Rîra eerûthîîte atî n'ûmûthûûku kiongo mbere ya Abimereki, ûra n'we aamwîngatiirie aathi.
34
1 Ngaakumagia Mwathani magiita monthe,ntikoorotiga kûmûkumia na kanyua gaakwa.
2 Ngaakumia Mwathani n'ûntû bwa bûra arûthîîte,
Bara bainyîîrie i beegue na bagwîrue.
3 Tûkumieni Mwathani tûrî amwe,
na tûkaatheni riîtwa rîake.
4 Ndeetire Mwathani, nwe aancookeria maromba.
Ankûûra ûguayaani bwakwa bunthe.
5 Bara beetîgagia Mwathani abateethia i bagwîragua,
na batikaarogîa îgi.
6 Ndaarombire Mwathani nkînyamaara, aambîgua na aancookeria maromba maakwa,
na aanduta mathîînaani maakwa monthe.
7 Mûraîka wa Mwathani akaragia bara bamûtîîyaga,
na akabakûûra kuuma thîînaani.
8 Camaani bwîgue bûra Mwathani arî wega bûgana!
Gîkeno i kîrî muntû ûra amwîrîgagîîra.
9 Tîîyagaani Mwathani biû atheru baake,
n'ûntû bara bamûtîîyaga gûtirî kîo baagaga.
10 Wana cimba nwa ibûûte n'ûntû bwa kwaga bia kûrîa,
îndî bara batîîyaga Mwathani gûtirî gantû keega baagaga.
11 Ncûûni, biû aana baakwa bûnthikîîrie,
na mbûrutane gûkuthûka Mwathani.
12 N'ûkwenda gûtûûra ûkeneete, ûkari bwega?
N'ûkwenda gûtûûra kagiita kaaraaya na ûkeneete?
13 Kwoogu menyeera ûtikaarie ûthûûku,
kana waaria ûrongo.
14 Tiga kûrûthaga mantû maathûûku, rûthaga mantû meega,
rîonthe ceragia ûkiri na nkoro yaku yonthe.
15 Mwathani araithagîîria bara baagîru,
na n'eegagua maromba maao.
16 Mwathani atigwatanagîra na bara barûthaga ûthûûku,
kaingo baakua, nthûti îmwe bataririkanwa nthî îno kaîrî.
17 Mwathani n'eegagua maromba ma antû bara baagîru,
na akabakûûra bakauma mathîînaani maao.
18 Mwathani arî akubî na bara bakuîte nkoro,
na n'oonokagia bara batarî na wîrîgîîro.
19 Bara baagîru nwa boone mathîîna maingî mûno,
îndî Mwathani n'abatunyûkagia kuuma kîrî mamu monthe.
20 Mwathani n'abamenyagîîra mûno na atibarekagîîria bagurarua nwa aniini,
na gûtirî mwîndî wao nwa ûmwe ûkaunwa.
21 Bara bathûûku bakaathirua n'ûthûûku bwao bongwa,
na bara bathwîre bara baagîru bakaagiitîrwa îgamba bûthûûku.
22 Mwathani noonokagia mîoyo ya aruti ngûgî baake,
na bara bonthe beegwatagia Mwathani batiigiitîrwa îgamba bûthûûku.