ÎBUKU RÎA MANNA
Sabu 90-106
Îromba rîa Musa
Îromba rîa Musa mûruti ngûgî wa Ngai.
90
1 Mwathani, woû i woû ûtûûraga ûrî ûtûûro bwetûnciarwani cionthe.
2 Mbere ûûmba irîma,
kana ûûmba nthîgûrû, woû warî Ngai mûtûûra mwoyo,
na ûgaatûûra ûrî Ngai mwanka tene na tene.
3 Ûcookagia antû tîîriini,
ûkauga, “Cookaani tîîriini biû aana ba antû.”
4 N'ûntû mîanka ngiri kîrî woû i bûmwe na ntugû îmwe,
nwa ta îgoro bûra rîrakûrûkire,
kana kagiita ga kûraaria ûtugû.
5 Ûtûkondoragia wa ta bûra mûgwû ûkondoragia, tûthiraga na mpwî ta kîrooto.
Tûkari ta nyaki îmbîthî rûkîîrî,
6 bûra îkûraga na îkaririma bwega,
ûgoro bûgîkinya îkanyaara na îkaûma.
7 Tiû, tûkûthirua i mûthûûro waku,
na twamakua i marûrû maaku.
8 Meeyia meetû ûmaigîîte mbere yaku,
meeyia meetû ma witho namo wamaiga ara ûûmba kûmoona.
9 Ntugû cietû cionthe ithirîîte gûkûrûkîîra mûthûûro waku,
îthiraga ta gwincia na kûrancûkia.
10 Mîanka yetû ya gûtûûra i mîanka mîrongo mûgwanja,
kana mîanka mîrongo înaana wegua tûrî na inya.
Amwe na ûgu yûûyûrîîte thîîna na kîeba,
ûtûûro bûthiraga na mpwî, naati tûkathi tûkathira.
11 N'ûû wiyî bûra inya ya mûthûûro waku îgana,
kana akamenya bûra ûbatîîrue ûtîîywa n'ûntû bwa marûrû mamu maaku?
12 Tûrutane kûmenya bûra tûrî na ûtûûro bûûkai,
kaingo tûgea na ûûme.
13 Mwathani, ûkaathûûra mwanka rî?
Twîgîîrue kîao, tiû aruti ngûgî baaku!
14 Tûûyûrie wa rûra rûkîîrî na wendo bwaku bûra bûtathiraga,
kaingo tûkena na tûgwîrua ntugû cietû cionthe.
15 Tûkenie ntugû igana wata ira watûthangîkiirie,
na mîanka îgana wata îra twoneete thîîna.
16 Tûrekeerie, tiû aruti ngûgî baaku, twone mantû maaku ma inya mara ûrûthîîte.
Na nciarwa cietû nacio, cione ûkumio bwa inya yaku îînene.
17 Wega bwa Mwathani Ngai wetû, bûrookaraga naati,
arootûteethagia kûûmbana mantûûni monthe mara tûkaarûthaga.
Yîî, rikithia ngûgî ya njara cietû.