Ngai n'we mûtûmenyeeri
91
1 Ûra wonthe akaraga ûmenyeerini bwa Ûra Arî Îgûrû Mûno,ûra aigagwa mayîîga i Mwene Inya Yonthe,
2 nwa eere Mwathani ûûgû, “Woû i woû wîbitho bwakwa na mûûmmenyeeri.
Woû ûrî Ngai wakwa, ûra mbîtîgîîtie.”
3 N'ûntû we agakûrigagîîria kuumania na mîtego îmîthûûku
na kuumania na mîrimo îmîthûûku.
4 Agakûguîkîra na mathabu maake,
na agakwaiga bwega ûmenyeerini bwake.
Gwîtîgîka gwake ûkeegua kûrî rong'o na îtumo rîaku.
5 Ûtiikuthûka kûmakua ûtugû,
kana mûgwî wa mûthenya,
6 kana ûkuthûka mîrimo îra yûûragaga ûtugû,
kana wînyangia bûra bûûyaga kûrî mûthenya.
7 Antû ngiri îmwe nwa bagwe rûteere rwaku,
na bangî ngiri îkûmi rûteere rwa njara ya ûrîo,
îndî woû gûtirî ûthûûku bûgaakûringithia.
8 Woû nwa kûraitha ûkaaraitha akî na meetho maaku
wone antû bara bathûûku bagîkaanûkua.
9 Ûtuîkithîîtie Mwathani wîbitho bwaku,
na Ûra Arî Îgûrû Mûno wamûtuîkithia mûkûmenyeeri.
10 Na kwoogu gûtirî ûthûûku bûgaagûkinyîîra,
gûtirî kînyamaara gîgaakinya akubî na mûciî waku.
11 Ngai akeera araîka baake bakûmenyagîîre
wa ara onthe ûkaathiyaga.
12 Ngai eerîîte araîka baake bakwambîîrie na njara ciao
kaingo ûtathuumûrua nwa mbayo ciaku i maiga.
13 Ûgaakinyanga cimba na njoka,
ûkaaraanga cimba ira nene na njoka ira mbîî.
14 Ngai augîîte, “Nkoonokia bara bambendeete,
na mmenyeere bara baambiyî ta Mwathani.
15 Baambîta, nkabeetîga,
nkeegagua ndî amwe nabo mathîînaani maao.
Nkabatuunyûkia na ntûme batîîywa.
16 Nkabaa ûtûûro bûûraaya
na mboonokie.”