Rwîmbo rwa gûkumia Mwathani
Sabuuri ya ntugû ya Sabatû.
92
1 N'ata bûrî ûntû bwega gûgûcookeria nkaatho, Woû Mwathani,na kwinaga tûgîkumagia riîtwa rîaku, Woû Ngai Ûra Arî Îgûrû Mûno,
2 n'ûntû bwega mûno kûmenyithanagia wendo bwaku wa mûthenya kûrakîa,
na gwîtîgîka gwaku wa ûtugû kûratuga,
3 na rwîmbo rwinîîtwe na ngita
na kînanda.
4 N'ûntû Woû Mwathani, n'ûngwîrîîtie na ngûgî ciaku cia inya,
ndiina nkeneete n'ûntû bwa bûra ûrûthîîte.
5 N'ata ngûgî ciaku Mwathani, irî inene!
Mathûgaania maaku i ma îgûrû mûno!
6 Muntû atarî mûûgî atiûmba kûmenya,
kîaa gîtiûmba gûciûkîrwa i mantû mama,
7 atî antû bara bathûûku kinya bakaririma ta nyaki,
na bara barûthaga mabîtia kinya bagatonga,
bakaathirua cwe.
8 Îndî Woû Mwathani, ûtûûraga ûûkîîrîîtue tene na tene.
9 Na mma Mwathani,
anthû baaku bakaathirua,
na bara bathûûku bonthe bakaûmbwa.
10 N'ûmpeete inya ta ya mbogo,
n'ûntharimîîte na gîkeno.
11 I ndîîbonereete na meetho maakwa gûcindwa kwa anthû baakwa,
ndeebîgîîrua na matû maakwa kîrîro kîa bara bathûûku bara baambithûkagîra.
12 Bara baagîru bakaaririma ta mîkîîndû,
bagaakûra ta mîthithinda ya Rebanoni.
13 Bakari ta mîtî yaandîtwe ndeeni ya Nyomba ya Mwathani,
îra îkûraga ndeeni ya Nyomba ya Ngai wetû.
14 Bakaagîîyaga na maciara kinya barî bakûrû,
bagaakara barî na inya na barî baîthî,
15 Ûûgû i ta kwonania Mwathani n'ûmwagîru,
na atî ûra aamenyagîîra atirî na mabîtia ndeeni yake.