Kîrîîkanîro kîa Ngai na Ndaundi
Sabuuri ya Ethani Muesiraiti.
89
1 Mwathani, nkainaga bûra woû ûrî wa wendo bûtathiraga,na nkaamenyithanagia rîonthe bûra ûrî mwîtîgua kîrî nciarwa cionthe.
2 Imbiyî wendo bwaku bûra bûtakîthira bûgaatûûra tene na tene,
Nkaamenyithania bûra ûrî mwîtîgua.
3 Woû waugîre, “I mbaigîîte kîrîîkanîro na muntû ûra ndaathuurire.
I ndaigire wîrane na Ndaundi mûruti ngûgî wakwa, ndauga,
4 ‘Rûrîîyo rwaku rûgatûûra rûkîathanaga,
ngaatûma ûnene bwaku bûtûûra tene na tene.’ ”
5 Îgûrû rîriina rîgîkumagia mantû ma kûrigaria mara ûrûthaga, Mwathani.
Biûmbe bira bitheru nabio bikaina birî kîgoomanooni kîa bio, bikiugaga bûra ûrî mwîtîgua.
6 Gûtirî ûngî gûku îgûrû akari ta woû, Mwathani,
ûtiûmba kûganaanua na kîûmbe nwa kîrîkû kîa gûku îgûrû.
7 Woû, n'ûtîîyîîtwe mûno kîûthûranooni kîa biûmbe bira bitheru,
na n'ûkuthûkîîtwe nkûrûki ya bonthe bara bakûthiûrûkîrîte.
8 Gûtirî ûngî arî na inya ta woû, Mwathani wa Njûûrî.
Mantûûni monthe wîgagua ûrî mwîtîgua, Mwathani.
9 I woû wathaga îria rîra rîringaga nkububania na inya,
rîra makûmbî maûkîîra n'ûmakiragia makagwîrîîra.
10 Wathontoriirie nyamû îra nene ya îria yîîtagwa Raabu wamîûraga,
wanyagaaria anthû baaku na inya yaku îînene.
11 Îgûrû i rîaku, na kinya nthîgûrû n'yaku,
i woû waûmbire nthîgûrû na bionthe bira birî ku.
12 I woû waûmbire mbarî ya îgûrû na kinya mbarî ya iti.
Kîrîma gîa Tabori na kîa Erimoni birîkwinîra bikeneete.
13 I ka ûrî na inya înene ata!
Njara yaku îrî inya, njara yaku ya ûrîo yûkîîrîîtue îgûrû.
14 Wagîru na ûmma i bio mûcingi wa ûnene bwaku.
Mantû monthe mara ûrûthaga moonanagia ûrî na wendo na bûra ûrî mwîtîgua.
15 Kîthaarimo i kîrî bara baiyî gûgûkumia na nyîmbo,
bara batûûraga werûûni bwa wega bwaku, Mwathani.
16 Batiindaga bakeneete mûthenya unthe n'ûntû bwaku,
na bagagûkumagia n'ûntû n'ûbarûthagîra mantû meega.
17 N'ûtweyaga inya ya kûrigaria tûgacinda anthû beetû,
tûrûaga tûkiugagîîria n'ûntû n'ûtwendeete.
18 Mwathani, i woû watûthuurîîre ûra agaatûrigagîîria,
woû Ûra Mûtheru wa Isiraeri, i woû watweere mûnene wetû.
Wîrane bwa Ngai kîrî Ndaundi
19 Karaaya mûno n'wariirie na njîra ya kioneki,
kîrî aruti ngûgî baaku bara eetîgua wabeera ûûgû,
“I neenkanîrîîte ûteethio kîrî ncamba îmwe ya ndûa,
na ndaanenkera ûra ndathuurîîte kuuma kîrî antû gîtî kîa ûnene.
20 I ntuîkithîîtie Ndaundi mûruti ngûgî wakwa mûnene,
na njîra ya kûmwîtûûrîria maguta maakwa mara matheru.
21 Nkeegagua ndî amwe n'we magiita monthe,
nkamwîkagîra inya.
22 Anthû baake batimûkîria inya rî kana rî,
antû bara bathûûku batimûûmba.
23 Nkaathiria anthû baake akîonaga,
na mbûrage bonthe bara bamûmeneete.
24 Nkamwendaga na mbîgue ndî mwîtîgua kîrî we,
nkamweyaga ûûmbani rîonthe.
25 Nkaaramia ûnene bwake
kwanjîîria îriani rîa Menditarîniani mwanka muurooni wa Yufîrîti.
26 Ndaundi akaambîîra ûûgû, ‘Woû ûrî Baaba na Ngai wakwa,
Rwara rwakwa rwa iiga, Mwonokia wakwa.’
27 Nkamûtuîkithia kîîmbere gîakwa gîa kaîyî,
na mmûtuîkithie ûmûnene nkûrûki ya anene ba nthîgûrû bonthe.
28 Na ngaatûûraga mmwendeete na mmûmenyagîîre tene na tene,
na kîrîîkanîro gîakwa n'we gîgatûûraga tene na tene.
29 Ûnene bwake bûgatûûra mwanka rîra nthîgûrû îkaathira,
na rûrîîyo rwake rûgatûûra rwathanaga tene na tene.
30 Îndî ûkeegua nciarwa ciake itiathîkîra watho bwakwa
na batiikara kûringana na maathana maakwa,
31 barege gûkaraga bûra mbeerîîte,
na barege kûmenyeera maathana maakwa,
32 rîru nkabakaanûkia n'ûntû bwa meeyia maao,
na ntûme banyamaare n'ûntû bwa mabîtia maao.
33 Îndî ntiitiga kwenda Ndaundi
kana ndega kwingia wîrane bûra ndamwîrire.
34 Ntiuna kîrîîkanîro kîra ndaarîîkanîîre n'we,
kana ngarûra wîrane bûra ndamwîrire.
35 Rîmwe na rîa mûthia indaathiîtiirie na riîtwa rîakwa rîîtheru,
atî ntikaaroenia Ndaundi rî kana rî.
36 Rûrîîyo rwake rûgaatûûra tene na tene,
na ûnene bwake nabu nkabumenyagîîra mwanka rîra riûa rîgaatiga kûthûa.
37 Ûnene bwake bûgaatûûra tene na tene wa ta bûra mweri ûtûûraga,
ûkîonagwa îgûrû matuuni.”
Kûrîrîra mûnene aacindwa
38 Îndî n'ûthûrîîtue i mûnene ûra ûthuurîîte na njîra ya kûmwîtûûrîria maguta,
wamûtiganîria na wamûrega
39 N'ûreganîîte na kîrîîkanîro kîra bwarîîkanîîre na mûruti ngûgî waku,
na wenyangia kîraûni gîake wakîrekia nthî ntagaani.
40 N'womorangîîte nthingo cia taûni înu yake na wenyangia nyomba ciake cia kwîbitha,
ira ciakîîtwe na nthingo imbitu.
41 Into biake biaiyagwa i mûkûrûki na njîra wonthe,
bara bariganîrîîtie nabo bonthe baatua kûmûthekeera.
42 N'ûtûmîîte anthû baake baûmbana,
na watûma bara bamûthwîre bonthe bakena.
43 N'ûtûmîîte mîrigo yake ya ndûa îtuîka ya ûtheri,
na wamûrekeeria aaturwa ndûani.
44 N'ûmûtunyîîte mûraagi wake wa ûnene,
na waturania gîtî gîake kîa ûnene nthî.
45 Na watûma akûra atakinyîîtie,
na wamûguîka îgi ta nguo.
46 Mwathani, n'ûgaatûûra wîbithîîte mwanka tene na tene?
Mûthûûro waku n'ûgaatûûra wankanaga ta mwanki mwanka rî?
47 Mwathani, ririkana ûtûûro bwa muntû i bûûkai,
na ûririkane watûûmbire twinthe tûrî antû!
48 N'ûû ûûmba gûtûûra na atakue?
N'ata muntû aûmba kwîrigîîria atikaathûûngîrue nthikooni?
49 Mwathani, bûrîkû wendo bwaku bûra watwendete nabu tene,
Marîkû mawîrane mara weerire Ndaundi?
50 Ririkana bûra niû, mûruti ngûgî waku nkûrumaangwa,
na bûra mbûmîîrîîtie irumi bionthe bira nkûrumwa i mîgongo îra îtagûtîîyaga.
51 Anthû baaku, Mwathani, nwaka bakûruma mûnene waku ûra ûthuurîîte wamwîtûûrîria maguta!
Bamûrumangagîra wa ara onthe athiyaga.
52 Kumagiani Mwathani tene na tene!
Aameni na kaîrî Aameni!