Îromba rîa kûromba ûteethio îgiita rîa thîîna
Sabuuri ya aana ba Kora. Kîrî mûtongoria wa wini. Rwinwe na mwinîre wa rwîmbo rûra rwîtagwa, “Kînyamaara gîa kûthîîna.” Sabuuri ya Emani wa kuuma Ethani.
88
1 Mwathani, Ngai, mwonokia wakwa, Ntiindaga gûkûromba mûthenya unthe,na nkarîra ûtugû ndî mbere yaku.
2 Îgua îromba rîakwa,
na ûkiinde gûtû ûthikîîrie kîrîro gîakwa ûnteethie!
3 N'ûntû ndigicîîtwe i mathîîna maingî mûno
na ndî akubî gûkua.
4 Ntaranîrîtue bûmwe na bara barî akubî gûkua,
ntirî na inya nwa aniini.a
5 Nkari ta muntû ûtiganîrîtue na bara bakuû.
Ntarîîtwe ta ûmwe wa bara baûragîîtwe bakamaamua nthikooni.
Bara ûtagîcooka kûririkana kaîrî,
bo bara ûrutarutîîte ûmenyeerini bwaku.
6 Ûûngereete nthikooni mborokerooni,
gûntû kûrî na mwindu na kworokeru mûno.
7 Mûthûûro waku ûûmaamîrîîte mûno,
wanthontoria na makûmbî maaku monthe.
8 Watûma acoore baakwa bantiganîria,
wantuîkithia ta gîntû gîa gûkuthûkwa kîrî bo.
Ndî ûmwingîre na ntiûmba kuuma.
9 Meetho maakwa i mathirîîte i kûnyamaara kûra nyamaarîîte.
Ngûkayagîra wa ntugû kûrakea,
na ngakûromba mbûkîîrîîtie njara ciakwa îgûrû.
10 Bara bakuû nabo rî, n'ûkabaringagîra biama?
I bariûkaga na bagagûkumia?
11 Wendo bwaku bûra bûtathiraga ibûtûmagîîrua nthikooni,
kana gwîtîgîka gwaku gûntû kwa wînyangia?
12 Biama biaku i bionagwa gûntû gûku kwa mwindu?
Kana wega bwaku bûkamenyekana nthîgûrû înu ya ûriganîria?
13 Mwathani, i woû nkayagîra ûnteethia,
wa rûûkîîrî i nkûrombaga.
14 I mbi n'ûntû ûndegeete Mwathani?
Ûmbuthatirîtie mûgongo i kî?
15 Kuuma wîthî bwakwa nyamaarîîte, akubî gûkua,
nthirîîtue inya i mantû ma kûmakania mara ûûndûthîîte.
16 Marûrû ma mûthûûro waku i mambebenjeete,
na mbûûro yaku ya kûmakania n'îmbînyangîîtie.
17 Ntiindaga nthiûrûkîrîtwe n'yo mûthenya unthe
ta mûguû wa rûûyî, makambingîîria nteere cionthe.
18 N'ûtûmîîte kinya acoore baakwa ba ndeeni mûno baantiganîria,
bara mbiyeene nabo, barî mwinduuni.