ÎBUKU RÎA MATHATÛ
Sabu 73-89
Weega bwa Ngai
Sabuuri ya Asabu.
73
1 Na mma Ngai n'ûmwega kîrî antû ba Isiraeri,kîrî bara batheru nkoro.
2 Nkwona bûra bara bathûûku baarî na into,
i ndaarî nkûgwatwa i rûriitho n'ûntû bwa eekumia babu,
3 kwoogu ndaarî becû nkua nkoro,
na becû wîtîgio bwakwa bûthira.
4 N'ûntû batûûraga ûtûûro bûtarî ûrûrû,
mîîrî yao n'îmîgima na îrî inya.
5 Batinyamaaraga ta antû bara bangî,
bo batigwatagwa i mathîîna mara magwataga antû bara bangî.
6 Wîkumia bwao bûtirî witho, i bûûrîîni bûrî ta mûkathî ûrî nkingo,
na beeguîkaga ûtuunyani ta nguo.
7 Nkoro ciao ciûyûrîîtwe i mantû mathûûku.a
Na mathûgaania maao maûyûri mîbango îmîthûûku.
8 Bathekagîîra na bakaaria mantû mathûûku ma antû bara bangî,
beekumagia na bakabaanga mantû ma kwinyîîria bara bangî.
9 Baaragia ntheto inthûûku cia Ngai ûra arî îgûrû,
na baathaga antû ba gûkû nthîgûrû na wîkumia.
10 Kwoogu antû ba Ngai bakaathikîîria bûra bakuuga,
na bakabeetîgia gûtarî nkarari.b
11 Nabo bakaûria, “N'ata Ngai aûmba kûmenya?
Kûrî ûmenyo arî nabu Ûyu Arî Îgûrû Mûno?”
12 Ûûgû i bu bara bathûûku bakari,
rîonthe bakaraga batakûmaka bûra gûgaakara, bunka ûtonga bwao bûkîongerekaga.
13 Kwoogu kwîbaiga kûra ndebaigire
ndaakara ntakwîyia gûtaarî na gîtûmi.
14 N'ûntû mûthenya unthe nkaraga na kînyamaara,
na gûkaanûkagua wa ntugû kûrakîa.
15 Tookeegua i ndariirie mantû ta mamu,
wîgua Ndaatuîkire muntû atarî mwîtîgua kîrî nciarwa cia aana baaku.
16 Îndî nkûgeria gûciûkîrwa i mantû mama monthe,
ndoona bûrî ûntû bûûmo mûno,
17 mwanka rîra ndathûngîîre Nyomba ya Ngai.c
Rîru i rîo ndaciûkîîrwe i bûra gûgakarîka kîrî bara bathûûku.
18 Na mma ûbaigîîte gûntû gûûtenderu,
na ûgaatûma bagwa na baaragane.
19 Bakeenyangua nthûti îmwe,
bakue gîkuû kîîthûûku mûno!
20 Wa ta bûra muntû aindûkagîra akûrootaga, ataririkane bûra akûrootaga,
nwa ta bu Mwathani rîra ûkaaya,
bakaanyagaarania baûre.
21 Nkûmuuntwa i kîîria nkoro,
ndankanwa bûûî i mûthûûro,
22 ndarigicanire ndaakara ta kîaa gûtarî bu gîkûmenya,
ndaakara û mûthemba wa nyamû ya kîthaka kîrî woû.
23 Îndî amwe na ûgu rîonthe ndî amwe naawe,
na ûngwete njara ya ûrîo.
24 Ntongoreeria na kîrîra gîaku,
na nyuma yoogu ûmbire mwagooni waku.
25 N'ûû ûngî Ndî n'we îgûrû tatiga woû?
Na n'ûntû i Woû ndî naawe rî, i mbi îîngî nkwenda aaga nthîgûrû?
26 Mwîrî wakwa na nkoro yakwa nwa ithire inya,
îndî Ngai n'we inya ya nkoro yakwa
na n'we rûgai rwakwa tene na tene.
27 Na mma bara bagûtiganagîria bakaathirua,
ûthirie bonthe bara batarî eetîgua kîrî woû.
28 Îndî aakwa niû, i bwega kûthengeera akubî na Ngai.
I ntuîkithîîtie Mwathani Mwene Inya wîbitho bwakwa,
kaingo ntûmagîîria mantû ma ngûgî ciake cionthe.