Îromba n'ûntû bwa gûkûûrwa kwa mûgongo
Sabuuri ya Asabu.
74
1 Woû Ngai, i mbi îtûmîîte ûtûta cwe tene na tene?I mbi n'ûntû mûthûûro waku ûgwankana mwanki i ng'ondu cia ûrîîthi bwaku?
2 Ririkana antû baaku, bara wethurîîre kuuma woo tene,
bo bara wakûûrire ûkombooni batuîka antû ba mwîrîga wa rûgai rwaku.
Ririkana Kîrîma gîa Sayuuni kîra watwîre îgiita rîmwe.
3 Kûûria magûrû maaku ûthi nyomba yaku îra îtuîkithîîtue maganjo mwanka tene na tene,
wone bûra anthû beenyangîîtie bionthe bira birî bantû aaku ara atheru.
4 Anthû baaku baakururire barî Nyomba yaku ndeeni, kwonania bagûcinda,
Baacuuriirie bendeera ciao irî rwano rwao.
5 Boonekanaga ta antû baarî kîthakaani,
bagîtemaga mîtî na tûthoka twao.
6 Baatûmîîre tûthoka na nyondo,
kwînyangia into bionthe bira biatumîîtwe na mbaaû.
7 Beekîîre Nyomba yaku îra ntheru mwanki yabîa cwe,
I baatûmire ara ûgongagîrwa atuîka ti bantû aatheru.
8 Beebîîraga nkorooni ciao, “Tûkaabathoontoria cwe!”
Baabîîthiirie ikaro bionthe ara Ngai aagongagîrwa nthîgûrû înu.
9 Gûtirî biama biitheru twonagua îîndî,
gûtirî kîroria nwa kîmwe gîtigeere tûrî nakîo,
na gûtirî nwa ûmwe wacietû wiyî gûgaakarîka ûgu mwanka rî.
10 Woû Ngai, i mwanka rî, mûnthû agakûnyûrûnta?
I ka agaatûûra akîbûthagia riîtwa rîaku tene na tene?
11 I mbi n'ûntû ûkûrega gûtûteethia?
I mbi n'ûntû ûkûrega ûkauga, “Arî,” rîra tûkwenda ûteethio,
na ûgatuinainîria kîongo kwonania ûkûrega?
12 Îndî Woû Ngai, ûtwîre ûrî mûnene wetû kuuma tene,
watwonokia magiita maingî.
13 I woû watuîkaniirie îria na inya yaku,
na wakanyakanya biongo bia nyamû ira nene mûno cia rûûyî rwarîo.
14 I woû wakanyakanyire biongo bia nyamû îra nene ya îria îîtagwa Rebiathani
na watûma îtuîka biakûrîaa bia nyamû cia rwanda.
15 I Woû watûrire inyaka na tuuro twa rûûyî,
na watûma miuro îra îtaarobwa îbwa.
16 Mûthenya n'waku, kinya ûtugû i bwaku,
na i woû waigire mweri na riûa bantû aabio.
17 I woû wekîîre mîanka yonthe ya nthîgûrû,
na watûma kwîgua kûrî na îgiita rîa thaano na rîa mpîo.
18 Mwathani, ririkana bûra anthû baaku bakûnyûrûntîîte,
bûra antû bara batagwîtîgîîtie bakûmenereetie.
19 Ûtikaarekeerie nyamû cia kîthaka mwoyo wa îceab rîaku.
Ûtikaariganîrue rî kana rî n'ûtûûro bwa antû baaku bara bainyîîrîîtue.
20 Ririkana kîrîîkanîro gîaku kîra warîîkanîîre naati,
n'ûntû gûntû kunthe kûra kûrî na mwindu gûkû nthîgûrû kûûyûrîîte ikaro bia eenyangia.
21 Ûtikaarekeerie bara bainyîîrie bagîa îgi,
tûma nkîa na bara barî na ûbatu bagûkumie.
22 Ngai, Ncû, wîtheteere wengwa,
ûririkane bûra ûkûthekeerwa n'antû batagwîtîgîîtie mûthenya unthe.
23 Ûtikaathûkie îgondoka rîa anthû baaku woogu,
gîcaangaca kîa anthû babu baaku, kîra kîthiîte na mbere.