Sabuuri 75

Ngai agiitaga îgamba bûra kûbatîîrue

Kîrî mûtongoria wa wini. Rwinwe na mwinîre wa rwîmbo rûra rwîtagwa, “Ûtikeenyangie.” Sabuuri ya Asabu.

1 Itûgûgûcookeria nkaatho, Woû Ngai.

Tûrîcookia nkaatho, n'ûntû riîtwa rîaku rîrî akubî,

antû i baaragia mantû ma ngûgî ciaku bûra irî cia kûrigaria.

2 Ngai ariuga, “I nthuurîîte îgiita n'ûntû bwa kûgambithania,

na i niû ngambithanagia bûra kûbatîîrue.

3 Rîra nthîgûrû îkainainua na biûmbe bionthe bira birî ku,

i niû ningwa ngaatûma mîcingi yayo yîîbanda îrika.

4 Ndîîra bara beekumagia batigane na wîkumia bwao,

na bara bathûûku ndîbeera batige kwîbûkîîria.

5 Ndîîra antû bara beekumagia batige gwîkumia,

Ndîruta watho kîrî bara bathûûku nkabeera batige kwîbûkîîria.”

6 Mantû ma Ngai ma kûgiita îgamba, matiumaga uumîîrooni kana ûthwîrooni bwa riûa,

kana mauma bwa naiti kana bwa mbarî ya neegûrû.

7 Îndî Ngai n'we agiitaga îgamba,

agakaanûkia ûmwe akarekeeria ûra ûngî.

8 Mwathani n'agwete gîkombe na njara,

gîkombe gîku kîûyûri ndibei îmbîru mûno.

N'we amîtûûraga, bara bonthe bathûûku ba nthîgûrû

bakamînyua na bakamînyuûkîîria.

9 Îndî naani, ngaatûûra ngîtûmagîîria nkuma ya Ngai wa Njakubu,

na mmwinagîre nyîmbo cia kûmûkumagia.

10 Ngai akeenyangia inya ya bara bathûûku,

îndî ya bara baagîru akamîongeera.