Ngai n'we mûûmbani
Kîrî mûtongoria wa wini. Rwinwe na into bia wini bia ndigi inyiingî. Sabuuri ya Asabu.
76
1 Ngai n'aiyîkeene Njunda,na riîtwa rîrî i rîînene mûno ndeeni ya Isiraeri.
2 Ûtûûro bwake bûrî Saremu,
gîkarooni gîake Sayuuni.
3 Naagu i noogo aunangîîre mîgwî îra yarî îmîî ya anthû,
rong'o na ndûûyiû ciao, yîî, into biao bionthe bia ndûa.
4 Woû Ngai, ûrî wa mwago ûmûnene,
na ûrî ûmûnene mûno nkûrûki ya irîma bia ntwîre,a
naara wacindîîre anthû baaku.
5 Acikaarî baao bara ncamba i batuunyîîtwe bionthe bira baarî nabio.
Îîndî bamaami toro ya mûthia,
inya yao na waara bwao bionthe i bia mana,
na gûtirî bu beeteethia.
6 Rîra Woû Ngai wa Njakubu wabagondokeere,
mbaraathi na bara baarî nacio baagwîre bamaama toro ya gîkuû.
7 Îndî woû Mwathani, n'ûkuthûkîîtwe i bonthe.
Gûtirî we ûûmba kûûmîîria kûrûngama mbere yaku rîra ûthûûri.
8 Ûgiiti bwaku bwa îgamba wabumenyithaniirie kuuma îgûrû matuuni,
na antû ba nthîgûrû baamaka baakira ki,
9 rîra waûkîîre kûgiita îgamba,
kaingo wonokia antû ba nthîgûrû bonthe bara bainyîîrîîtue.
10 Na mma Ngai ûgaatûma bara bathûûri bagûkumia kinya nkûrûki,
na matigari ma anthû baaku magakûgonga.
11 Aigaani mîthiîtio na Mwathani Ngai wenu, na bûmîûyûrie,
nthîgûrû cionthe ira imûthiûrûkîrîîte i reete biewa,
kîrî we ûra abatîîrue akuthûkwa.
12 N'abooragîîria atongoria eekumia,
na n'akuthûkîîtwe n'anene ba nthîgûrû.