Kûboorerua kagiita ka mathîîna
Kîrî mûtongoria wa wini Njenduthuni. Sabuuri ya Asabu.
77
1 Ingûkayîra Ngai,mmûkayîre nainya, kaingo aambîgua.
2 Ntugû îra ndî na thîîna ndombaga Mwathani.
Ûtugû bunthe mbûkagîîria njara ciakwa ntakûnoga nkîromba,
îndî amwe na ûgu nkoro yakwa yarega kûboorera.
3 Nthûgaanagia mantû ma Ngai, Ngatangîka,
ndaatarania, nkeegua ndaakua nkoro.
4 Mwathani ûtûmaga ndaara ntarî toro mwaka gûgakea.
Ngatangîka mathûgaania mwanka nkaremwa i kwaria.
5 Ntaranagia mantû ma ntugû cia karaaya,
nkaririkana mîanka ya tene îra yaathirire.
6 Ndirikanaga nyîmbo ciakwa ûtugû mmaami.
Nkathûgaania, nkebûûria ata rî,
7 “I ka Mwathani agaatûûra atûregeete mwanka tene na tene?
Atikooro akena i tiû kaîrî?
8 Atikooro atwenda kaîrî?
Atikooro aingia wîrane bwake kaîrî?
9 I ka Ngai ariganîrîtue i gûtwîgîîrua kîao?
I ka mûthûûro wake ûthûkîîtie kaanya ga kîao?”
10 Rîru ndauga, “Kîeba gîakwa n'atî
Ngai Ûra arî Îgûrû Mûno n'agarûkîîte.”
11 Nkaaririkana ngûgî cia Mwathani,
yîî, nkaaririkana biama bira waringaga tene.
12 Nkaathûgaanîria mantû mara monthe ûrûthîîte,
na ntaranie ngûgî ciaku cionthe cia inya ira ûrutîîte.
13 Mantû monthe mara ûrûthaga, Woû Ngai, i matheru.
Gûtirî ngai ûngî mûnene ta woû Ngai wetû.
14 Woû ûrî Ngai ûra aringaga biama,
n'wonaniirie inya yaku gatîgatî ka mîgongo.
15 I woû wakûûrire antû baaku na inya yaku,
Aana ba rûrîîyo rwa Njakubu na rwa Njosebu.
16 Woû Ngai, rîra ndûûyîa ciakwonire,
ciakarire ta muntû ûmûmakie.
Îria rîainainire mwanka nkona.
17 Matu moonoria mbura ta rûûyî rûgûtûûrwa,
îgûrû rîathaandîkia nkwa,
rweni rwaku naru rwanyagaara nteere cionthe ta mîgwî îmîgere.
18 Mûrurumo waku weguîkire kîbuubaniini kîînene,
rweni rwamûrîka nthî,
nthîgûrû yathetema na yainaina.
19 Wagendeere îriani,
waringa îria rîru rîorokerete bûgana ûgu,
îndî mbayo ciaku itikîûmba kwonekana.
20 Watongoreerie antû baaku wa ta bûra mûrîîthi atongoragîîria ng'ondu ciake,
watûmîîre Musa na Arûni baatongoreeria antû baaku,
bakari ta mûrîîthi atongorereetie nyamû ciake.