Ngai na antû baake
Sabuuri ya Asabu.
78
1 Antû baakwa, thikîîriani ûrutani bwakwa,tegaani matû bwîgue bûra nkuuga.
2 Ndîaria ngîtûmagîra ngerekano,
na ntarîîrie iriga bia kuuma rîra nthîgûrû yaûmbirwe,
3 mantû twegiirue na twamamenya,
mara tweerirwe i biûyûûyû bietû.
4 Tiû tûtiitha aana beetû mo,
tûkeera nciarwa ira irî nyuma yetû
ûkumio bwa Mwathani, na ngûgî ciake cia inya,
na mantû maake ma kûrigaria mara arûthîîte.
5 N'ûntû n'eeyanire ûkûûyî kîrî antû ba Njakubu,
na eekîra watho ndeeni ya Isiraeri.
Bûra aathire biûyûûyû bietû
birutana aana baao.
6 Kaingo nciarwa ira ikaaya imamenya,
nabo n'aana bara bagaaciarwa,
wana bo bacooke beere aana baao.
7 Kwa njîra înu wana bo bakaiga wîtîgio bwao kîrî Ngai,
na batiiriganîrua i ngûgî cia Ngai,
Îndî rîonthe bakaathîkagîra maathana maake.
8 Batikaaye gûkara ta biûyûûyû biao,
rûciaro rûûremu na rûtaathîkaga,
rûciaro rûra rûtaandîîte nkoro ciao kîrî Ngai,
rûra rûûmo kîongo,
na rûteegagua rûrî rwîtîgua kîrî Ngai.
9 Ncamba cia ndûa cia Eburaimu, amwe na kwîgua barî na mîrigo ya ndûa,
ntugû ya ndûa i baûndûkiirie mîgongo yao baakuthûka.
10 Bo bataiga kîrîîkanîro kîao na Ngai,
i baaregire kwathîkîra mawatho maake.
11 I baariganîîrue bûra aarûthîîte,
na biama bira aabaringîrîte.
12 Ngai aaringire biama biûyûûyû biao bikîonaga,
rîra baarî gîteere kîa Soani, nthîgûrû ya Miisiri.
13 Aagaaniirie îria na abariingia gûkûrûkîîra agu,
aatûma rûûyî rûrûûngama rwîbandîîte ta rûthiingo.
14 Mûthenya aabatongoragîîria na îtu,
na ûtugû bunthe akabatongoreeria na werû bwa mwanki.
15 Aatûrire njara cia maiga naagu rwanda,
kaingo abakuundia rûûyî rwingî ruumîîte naagu mborokerooni.
16 N'aatûmire tuuro tûtûrîka rwaraani rwa iiga,
na aatûma rûûyî rûtua kûthi ta miuro.
17 Amwe na ûgu baathi na mbere kûbîtîria Ngai,
baarema Ûra Arî Îgûrû Mûno naagu ng'arûûni.
18 Baageriirie Ngai bakîendaga,
na njîra ya gwîtia biakûrîa bira beeriragîîria.
19 Baaruma Ngai, bakiugaga,
“I kû Ngai ûyu akûruta irio bia kweyana ng'arûûni ta îno?
20 Aaringire rwara rwa iiga, rûûyî rwatûrîka rwetîga boo,
na tuuro twaunûka.
I ka aûmba kweyana irio kinya bio,
kana apa antû baake nyama?”
21 Kwoogu Mwathani akwîgua ûgu aathûûra mûno.
Mwanki wake watumûkîra Njakubu,
na mûthûûro wake nau watumûkîra Isiraeri,
22 n'ûntû i baaregire gwîtîgia Ngai,
na bateetîgia inya yake ya kwonokania.
23 Îndî Ngai aarutîra matu watho,
aarugûra mîrango ya îgûrû,
24 na abaneenkera irio kuuma îgûrû.
Aurithia irio bietagwa manna ta mbura, antû babu baarîa.
25 Kwoogu baarîa irio bia araîka,
na Ngai aatûmîra antû babu bonthe irio kwa wingî.
26 Kaîrî aatûma ruuo rûra ruumaga uumîîrooni bwa riûa rûbuutana,
na rwa kuuma bwa iti arutongoreeria na inya yake.
27 Kîrî antû baake abareetera nyoni kuuma îgûrû,
ciaingîîte ta mûthanga wa îria.
28 Abaarûkîria cio kambîîni ciao gatîgatî,
nteere cionthe cia marema maao.
29 Nabo baarîa mwanka babaa,
n'ûntû Ngai aabaere kîra beendaga kûrîa.
30 Îndî mbere îtanûka rîthira,
wa bakîrîîyaga woogu irio birî tûnyuani twao,
31 Mûthûûro wa Mwathani wabaûkîîra
na aûraga ncamba ciao ira ciarî na inya mûno,
nthaka cia Isiraeri ira ciarî cia gîtûmi mûno.
32 Îndî amwe na kûrûtha ûgu bunthe, antû nwa baathiire na mbere kwîyia.
Bateetîgia kana biama bibu biarî bia kuuma kîrî Ngai.
33 Kwoogu aakubîia ntugû ciao cia gûtûûra,
na ûtûûro bwao bwatuîka bwa kîmako.
34 Rîra rîonthe aûragaga bamwe baao, bara bangî i baamûcookagîra,
bakaumbûra meeyia maao na bakaromba Ngai bakîmwerekaga mûno.
35 Baaririkana Ngai n'we aarî mûkûûri wao,
na atî Ngai Ûra Arî Îgûrû Mûno n'we aabateethagia.
36 Îndî i kûmweneeria bamwenagîîria na tûnyua twao,
bûra bunthe baaragia bwarî ûrongo.
37 Nkoro ciao itaarî mbaande ndeeni yake,
na bataarî eetîgua kîrîîkanîrooni gîake nabo.
38 Îndî we, naûyûrîîtwe i kîao,
n'aabarekeere wîyia bwao,
na ataabathiria.
Magiita maingî n'eegwataga atikaathûûre,
na ateerekeeria aûyûrwa i marûrû.
39 Aaririkana bo twaka kûrî kîo kîarî oogo n'antû tu,
nwa ta ruuo rûra rûbuutanaga rûkûrûkîîte na rûtacooke kaîrî.
40 I maita magana baamûûmîîrie biongo naagu rwanda,
na kûmûthûûrîria ng'arûûni!
41 Baakaraga bakîgeragia Ngai,
na kûthûûria Ûra Mûtheru wa Isiraeri.
42 Bataaririkana inya yake îînene,
kana ntugû îra aabakûûrire kuuma kîrî anthû baao.
43 Kana baririkana bûra aatûmire biama biake bionekana Miisiri,
na mantû maake ma kûrigaria moonwa gîteere kîa Soani.
44 Aagarûrire rûûyî rwa miuro yao rwatuîka nthakame,
nabo Amiisiri baaga rûûyî rwa kûnyua.
45 Aabatûmîîre mîruumbî ya ngi yabanyamaaria,
na biûra bienyangia nthîgûrû yao.
46 Aarekeeria imera biao bienyangua i maginyo,
na aatûma ûrîmi bwao bwenyangua i ngige.
47 Eenyangiirie mîcabiibû yao na mbura ya maiga,
n'yo mîkûyû yao na mbaraabu.
48 Aarekeeria ng'ombe ciao ciurîrwa i mbura ya maiga ciakua,
na nyamû ciao cia ndîîthia ciaûragwa i nkwa.
49 Abarekeeria mûthûûro wake ûmûnene,
marûrû, na mathîîna,
gîkundi kîa araîka ba wînyangia.
50 Ngai n'atûrîîre mûthûûro wake njîra,
ataabatîîrîra kûbaruta mwoyo,
n'aabaûragire na mûrimo.
51 Mwathani aûraga biîmbere bionthe nthî ya Miisiri,
biîmbere bia twîyî naagu maremaani ma Amu.
52 Rîru aatongoreeria antû baake ta mûrîîthi bûra atongoragîîria ng'ondu,
na abooneeria njîra gûkûrûkîîra rwanda.
53 Aabatongoreerie abamenyeereete, kwoogu bataamakaga,
îndî anthû baao baamerua n'îria.
54 Abakinyithia nthîgûrû yake îra ntheru,
mwanka kîrîmaani kîra aatunyanîîte na inya yake arî we wengwa.
55 Na nyuma yoogu eengatia mîgongo yauma mbere ya antû baake,
aagaaniirie nthîgûrû ya mîgongo înu yatuîka ya mîîrîga ya Isiraeri
aatûma mîîrîga ya Isiraeri îtûûra maremaani ma mîgongo înu.
56 Îndî i baaregire kwathîkîra Ngai Ûra Arî Îgûrû Mûno
na bamwîkîra magerioni.
Na bataathîkîra maathana maake.
57 Îndî bo baaremire na baaga wîtîgio ta biûyûûyû biao,
Baagîa na nkombo baakara ta ûta bûkoombu.
58 I baathûûriirie Ngai n'ûntû bwa bantû ara baagongagîra ngai cia ûrongo,
na bamûthûûria mûno na mîbuanaano yao.
59 Ngai akûmenya ûgu n'aathûûrire mûno,
kwoogu aarega antû babu baake ba Isiraeri cwe.
60 Aatiganîria gîkaro gîake kîra kîarî Siro,a
îrema rîra aakaraga gatîgatî ga antû baake.
61 Aarekeerie anthû baake baatuunyana îthandûkû rîa kîrîîkanîro,
rîra rîonanagia inya na mwago wake.
62 N'aathûrire n'antû babu baake bongwa
na abarekeeria baûragwa n'anthû baao.
63 Nthaka ciao ciarîrîmîîrwe ndûani,
na aarî baao bataarî na wa kûbagûra.
64 Athînjîri baao baûragîîrwe ndûani,
na ntigwa ciao iteetîgîîrua kûbarîrîra.
65 Rîru i rîo Mwathani aûkîîre ta muntû aumîîte torooni,
aakari ta ncamba ya muntû yaararîkaga n'ûntû bwa kûnyua ncoobi.
66 Aaturire anthû baake, abacookia nyuma,
abeekîrithia îgi rîmwe na rîa mûthia.
67 N'aaregire rûrîîyo rwa Njosebu,
atataara antû ba mwîrîga wa Eburaimu.
68 Îndî aataarire antû ba mwîrîga wa Njunda,
kîrîma kîa Sayuuni, kîra eendeete.
69 Agu noogo aakire Nyomba yake ta mûciî wake ûra ûrî îgûrû,
amînjîra yaita yakara ta bûra nthîgûrû îno îtûûraga yîîbînjîrîte tene na tene.
70 N'aathuurire Ndaundi mûruti ngûgî wake,
amûruta ûrîîthiini,
71 naara aarîîthagia ng'ondu,
na amûtuîkithia mûnene wa Isiraeri,
mûrîîthi wa antû ba Ngai.
72 N'we abamenyeera na nkoro îîmbega eerutanîrîtie,
na abatongoreeria na waara bwa mîkarîre yake.