Îromba n'ûntû bwa kwonokua kwa mûgongo
Sabuuri ya Asabu.
79
1 Nthîgûrû yaku Ngai, n'iithûkîrîîtwe n'antû ba mîgongo.I beekîrîîte mûgiro Nyomba yaku întheru,
na boomoranga taûni ya Njerusaremu.
2 Baatigire biimba bia aruti ngûgî baaku
bikîrîyagwa i nyoni cia îgûrû,
mîîrî ya atheru baaku îkîrîîyagwa i nyamû cia kîthaka.
3 Batûûrîîte nthakame ya Aisiraeri ta rûûyî
nteere cionthe cia Njerusaremu,
na gûtirî nwa ûmwe ûtigeere wa kûthika biimba bibu.
4 Tûtuîkîîte antû ba kûbûthîîrua i mîgongo îra tûriganîîrîîtie n'yo,
batûthekagîîra na bagatûnyûrûnta.
5 Mwathani, n'ûgaatûthûûrîra tene na tene?
I ka mûthûûro waku ûgatûûra wankanaga ta mwanki?
6 Erekeria mûthûûro waku kîrî mîgongo
îra îtakûgongaga,
kîrî ma ûnene
mara matakûrombaga.
7 N'ûntû i baûragîîte antû baaku rûrîîyo rwa Njakubu,
na beenyangia nthîgûrû yaku.
8 Ûtigaatûkaanûkie n'ûntû bwa wîyia bwa biûyûûyû bietû.
Twîgîîrue kîao îîndî,
n'ûntû wîrîgîîro bwetû i bûûthiru.
9 Tûteethie, itû Ngai mwonokia wetû,
n'ûntû bwa ûkumio bwa riîtwa rîaku,
tûtuunyûkie na ûtûrekere meeyia meetû
n'ûntû bwa riîtwa rîaku.
10 I mbi îgûtûma antû ba mîgongo batûûria,
“Ngai ûyu wenu îîndî, arîkû?”
Reka twone ûgîkaanûkia mîgongo
n'ûntû bwa kûrîania nthakame ya aruti ngûgî baaku îra îîtûûrîîtwe.
11 Tûma gûkaya kwa bara barî nceera gûgûkinyîre.
Kûringana na inya yaku îînene îra ûrî,
onokia bara batuîrîîtwe gûkua.
12 Mwathani, rîania mîgongo îra twankeene n'yo maita mûgwanja
n'ûntû bwa irumi bionthe bira bakûrumîîte.
13 Rîru naati antû baaku, ng'ondu cia ûrîîthi bwaku,
tûgagûcookeria nkaatho tene na tene.
Kuuma nciarwa kûthi nciarwa
tûkaugaga mantû ma ûkumio bwaku.