Îromba n'ûntû bwa Gûcookanîîria Mûgongo
Kîrî mûtongoria wa wini. Rwinwe na mwinîre wa rwîmbo rûra rwîtagwa, “Maûa ma kîrîîkanîro.” Sabuuri ya Asabu.
80
1 Tûthikîîrie, Woû Mûrîîthi wa Isiraeri,Twîgue woû mûtongoria wa rûrîîyo rwa Njosebu ta ûrîîthi bwa mbûri na ng'ondu,
woû ûra akarîrîte makerubi, marî ta gîtî gîaku kîa ûnene.
2 Îîbonanie kîrî antû ba mîîrîga ya Eburaimu, Benjameni, na Manase.
Twonie inya yaku,
ûûye ûtwonokie!
3 Tûcookanîrie, Woû Ngai,
Twîgîîrue kîao
na ûtwonokie.
4 Woû Mwathani Ngai wa njûûrî,
i mwanka rî, ûgaakara ûthûûri
i maromba ma antû baaku?
5 Ûtûpeete kîeba tûrîa bantû a irio bira tûrîîyaga,
na watwaa meethori tûnyua bantû a rûûyî rûra tûnyunyaga.
6 Ûtûtuîkithîîtie gantû ga kûrûagîrwa i mîgongo îra twankeene n'yo,
na anthû beetû nwaka bagûtûnyûrûnta.
7 Tûcookanîîrie kaîrî, Ngai wa Njûûrî.
Twîgîîrue kîao
na ûtwonokie.
8 I woû warutire mûcabiibû kuuma Miisiri.
Wengatia antû ba mîgongo bara baatwîre Kanaani, na wacuanda ku.
9 Nyumaani ûkwîngatia mîgongo înu îîngî,
antû babu baaku baatûûra Kanaani na baanyagaara nthîgûrû inu yonthe.
10 Nthîgûrû înu yonthe yatuîkire yao,
kuuma bwa iti kuunthe mbarî ya bwa îgûrû mwanka irîmaani bia Rebanoni.
11 Baathiiyangiirie mîanka ya nthîgûrû înu,
kuuma Îriani rîa Menditarîniani gûkûrûkîîra gûku kunthe mwanka muurooni wa Yufîrîti.
12 I mbi n'ûntû ûrarekeerie anthû bathûngîra nthî ya Isiraeri bamîatha? Îîndî ageni barîkûrûkîîra ku,
bakiiyaga na bakîmîînyangagia.
13 Bamîkinyangaga wata ngûrwe cia kîthaka bûra irûthaga,
na bakamîînyangia wa ta bûra nyamû cia kîthaka irûthaga.
14 Tûûndûkîre, Mwathani wa Njûûrî,
tûraithîîrie ûrî gûku îgûrû matuuni,
ncû wonokie antû baaku!
15 Ncû wonokie antû baaku bara waigire aaga
na wabatuîkithia mûgongo ûrî inya mûno.
16 N'ûbîîthîîtue na mwanki, i bautemereete nthî,
baraithe ûbatuîre îgamba na ûbathirie.
17 Menyeera antû baaku bara ûthuurîîte,
mûgongo ûra ûtûmîîte ûgîa inya mûno.
18 Tûtikoorogûtiganîria rî kana rî.
Tûtûûrie mwoyo, na tûgagûkumagia.
19 Tûcookanîîrie kaîrî, Woû Mwathani Ngai Mwene Inya,
twîgîîrue kîao, na ûtwonokie.