Weega bwa Ngai na ûthûûku bwa Isiraeri
Kîrî mûtongoria wa wini. Rwinwe na mwinîre wa rwîmbo rûra rwîtagwa “Ngitithi.” Sabuuri ya Asabu.
81
1 Inîraani Ngai ta we inya yetû, nyîmbo cia gîkeno,inaani bûgîkumagia Ngai wa Njakubu.
2 Mwinîreeni, bûkîringaga tamburiini,
na biringi îra yaragia bwega na wandîndî ya ndigi inyingî.
3 Ringaani karumbeta ga kûmenyithania kîatho gîkwanjîîria,
bûrûriinge mweri wayiûka na warûngama gatîgatî.
4 Ûgu i bu watho bwa Isiraeri buugîîte,
i bu Ngai wa Njakubu aathanîîte.
5 Aabûnenkanîîre kîrî antû ba Isiraeri
rîra aithûkîîre nthîgûrû ya Miisiri.
Inkwîgua kayû ntakûmenya gakiugaga,
6 I niû ndabwaûrire mîrigo iturooni bienu,
ndabûrekeeria bwaiga mîrigo yenu ya matubaarî nthî.
7 Wankayîîre ûrî thîînaani, naani ndakwonokia.
Ndaagwîtîgire ndî withooni mûrurumooni wa nkwa.
Naani ndakûgeria ûrî naagu inyakaani bia Meriba.
8 Antû baakwa, thikîîriani, mbûkaanie!
Woû Isiraeri, ndeenda mûno bûnthikîîria!
9 Gûtikeegue kûrî na ngai i ngeni gatîgatîîni keenu,
na ûtibatîîrue ûcigonga.
10 I niû Mwathani Ngai waku,
ûra aagûkûûrire wauma nthîgûrû ya Miisiri.
Wegua ûrî mwîtîgua, ngakûthaarima.
11 “Îndî antû baakwa nabo baarega kûnthikîîria,
Aisiraeri baatiga kûûmbathîkîra.
12 Kwoogu ndabarekeeria beetwara na ûremu bwao,
barûthe bûra bunthe beendaga kûrûtha.
13 Tookeegua antû baakwa beenda kûmbîgua,
na bakaambathîkîra!
14 Wîgua ndamaarîîrie anthû baao nthûti îmwe,
na ngaacinda anthû babu baao bonthe.
15 Bara bameneete nwaka baayaga gûûnturîria maru bakiinainaga n'ûguaya,
na îkaanûkia rîao rîgaatûûra tene na tene.
16 Naani ndaayaga kûbweyaga ngano îra mbega mûno bûrîîyaga,
na nkabûbaithagia na ûkî bwa kîthaka.”