Kûrombera mûnene
Sabuuri ya Soromoni.
72
1 Ngai oneeria mûnene bûra akaagiitaga magamba na ûmma,na ûmûrutane kwîgua arî ûmwagîru ta woû.
2 Aroogiitîra antû baaku magamba bûra kûbatîîrue,
na bara bainyîîrie na ûmma!
3 Irîma bikaareeta ûthii na mbere kîrî antû,
na tûrîma maciaro ma wagîru.
4 Mûnene aroogambîra nkîa bûra kûbatîîrue,
arooteethia bara barî na ûbatu,
na akîrie inya bara babainyagîîria.
5 Antû baroogûtîîya tene na tene,
wata riûa na mweri, nciarwaani cienu cionthe.
6 Mûnene arookara ta mbura îkuurîra mînda îmîande mbeû,
wata manyunyuû mara mariindaga nthî.
7 Wagîru bûroongeereka bantû onthe ntugû ciake cia mwoyo,
na Ngai aroongeera mantû meega kîrî antû baake tene na tene.
8 Akaathanaga kuuma îriani mwanka îriani,
na kuuma muurooni wa Yufîrîti kûthi mûthia wa nthî.
9 Antû bara batwîre rwanda bakamûturîria maru,
na anthû baake nabo bagaacindwa.
10 Anene ba Tarisisi na ba icîgîîrio bia îria
bakamûrutîra ûgooti,
nabo anene ba Seba na ba Seka
bakamûretera biewa.
11 Anene bonthe bakamûturîria maru,
na mîgongo yonthe îkamûtûmîkîra.
12 Agaatuunyûkia bara barî na ûbatu bamûkayîra,
amwe na nkîa ira itarî na wa kûbateethia.
13 N'eegagîîrua kîao bara batarî na inya na bara barî na ûbatu,
na n'oonokagia mîoyo ya bara athîîni.
14 N'we atuunyûkagia athîîni kuumania na bara babainyagîîria na bakabarûthîra ûthûûku,
mîoyo yao îrî gîtûmi kîrî we.
15 Mûnene arootûûra mîanka îmingî!
Aroonenkerwa thaabu ya kuuma Seba.
Antû baroomûrombagîra magiita monthe
na Ngai akamûthaarimaga ntugû cionthe.
16 Nthîgûrû îroogîa na irio biingî mûno,
irîma bigakunîkwa n'imera kûra îgûrû,
irio bibu birookûra wa ta bûra bikûraga irîmaani biîtagwa Rebanoni.
Taûni nacio irooyûra antû, ta nyaki kîthakaani.
17 Riîtwa rîa mûnene rîtikoororiganîria rî kana rî,
îgweta rîake rîrootûûra ta riûa.
Mîgongo yonthe îkaathaarimwa gûkûrûkîîra we,
na îkamwîta imûthaarime.
18 Mwathani Ngai arookumua, Ngai wa Isiraeri!
Nwa we wenka ûrûthaga mantû mama ma kûrigaria.
19 Riîtwa rîake rîra rîrî na ûkumio rîrookumua tene na tene,
nthîgûrû yonthe îroûyûrwa i mwago wake.
Aameni! Aameni!
20 Ûyû nuu mûthia wa maromba ma Ndaundi mwana wa Njesii.