Îromba rîa muntû ûmûkûrû
71
1 Mwathani, ndaaya kîrî woû kaingo ûmenyeera,ûtikaareke ngîa îgi.
2 N'ûntû ûrî ûmwagîru, nteethia na ûntuunyûkie.
Kiinda gûtû ûnthikîîrie na ûmbonokie.
3 Tuîka Rwara rwakwa rwa iiga rwa kwîbitha,
rûra nkaathiyaga kîrî ru rîonthe,
ruta watho bwa kûmbonokia,
n'ûntû woû ûrî Rwara rwakwa rwa iiga na bantû aitu a awîciitha.
4 Ngai wakwa, ntuunyûkia kuuma kwa ûra mûthûûku,
na kuuma inyaani ya bara bathûûku batarî kîao.
5 N'ûntû woû Mwathani Mwene Inya, i woû mbîrîgîîrîîte,
I woû mbîtîgîîtie kuuma ndî mwana mûnyi.
6 I woû ûtwîre ûntirîrîîte ûtûûrooni bwakwa kuuma gûciarwa.
I woû wandeetire kuuma nda ya maitû.
Ngagûkumagia rîonthe.
7 Mûtûûrîre wakwa wîgîîtue ûrî ngerekano kîrî baingî,
n'ûntû woû ûrî wîbitho bwakwa bûûriku.
8 Ingûkumagia mûthenya unthe
na kûmenyithania mwago ûra ûrî.
9 Ûtigante îîndî ndî mûkûrû,
ûtigaantiganîrie îîndî ntarî na inya.
10 N'ûntû anthû baakwa baaragia ûthûûku îgûrû rîakwa,
babu baangiitagîra baambûraga baaranagîria barî amwe,
11 bakauga, “Ngai n'amûtiganîîrie,
twîngane n'we tûmûgwate,
n'ûntû atirî na muntû wa kûmûtuunyûkia.”
12 Ngai, ûtigaakare aaraaya naani,
Ngai wakwa, ncû na mpwî ûnteethie.
13 Bara baambithûkagîra
baroocindwa na bakathirua.
Bara bageragia kûûnguraria baroomeneerua na bakagea îgi.
14 Îndî niû, nkaathi na mbere gûkwîrîgîîra,
ngagûkumia nkûrûki na nkûrûki.
15 Ndîtua kwaragia mantû ma wagîru bwaku,
na ma wonokio bwaku ntugû yonthe,
wana wegua mantû mamu marî nkûrûki ya bûra mbûmba gûciûra.
16 Mwathani Mwene Inya, nkaaya nkîîranaga mantû ma ngûgî ciaku cia inya.
Ngaatûmîîria wagîru bwaku bunka akî.
17 Woû Ngai, kuuma ndî mwana, i woû ûûndutanaga,
wana îmunthî tûrî, nwa mbaragia mantû ma ngûgî ciaku cia kûrigaria.
18 Kwoogu wana rîra ngaakûra mbuume mbuî,
Woû Ngai, ûtigantiganîrie,
wîgue ûrî amwe naani nkîîra antû mantû ma inya yaku îînene
kîrî nciarwa cionthe ira ikaaya.
19 Wagîru bwaku Ngai, i bûkinyîîte îgûrû matuuni,
n'ûrûthîîte mantû maanene,
gûtirî ûngî ûkari ta woû.
20 N'ûtûmîîte mbona mathîîna maingî na kînyamaara,
îndî ûgaacookanîîria ûtûûro bwakwa kaîrî,
na ûkandigîîria ntikaathûngîre nthikooni.
Ûkambûkîîria kaîrî.
21 Ûgaatûma gîtîîyo gîakwa kîongeereka,
na ûtûme nkena kaîrî.
22 Ngagûkumia na wandîndî,
n'ûntû bwa gwîtîgîka gwaku, woû Ngai wakwa,
ngakwinîra nyîmbo na ngita yakwa,
Woû Mûtheru wa Isiraeri.
23 Nkaugîîria nainya i gîkeno
rîra ngaakwinîra nyîmbo ngîgûkumia,
ngakwinîra na nkoro yakwa yonthe n'ûntû n'ûmbonokeetie.
24 Nkaaria mantû ma wagîru bwaku
ntugû yonthe,
n'ûntû bara beendaga kûûnguraria
i baacindîîtwe na baagîa îgi.