ÎBUKU RÎA MATAANO
Sabu 107-150
Tûcookerie Ngai nkaatho n'ûntû n'ûmwega
107
1 “Cookeriani Mwathani nkaatho, n'ûntû n'ûmwega,wendo bwake bûtûûraga tene na tene.”
2 Bwinthe bara bûkûûrîîtwe i Mwathani ugaani ûgu,
bara aakûûrire kuuma njaraani cia anthû.
3 Abeethîrania kuuma nteere cionthe cia nthî,
kuuma uumîîrooni bwa riûa na ûthwîrooni bwa rîo,
kuuma bwa mbarî ya neegûrû na bwa mbarî ya iti.a
4 Bamwe baariûngaga matuurûûni maatheri ng'arûûni,
bagîcwaga bantû agûtûûra na batoona.
5 Baarî na yûûra na bûûta,
wîrîgîîro bwao bwaroromera ndeeni yao.
6 Rîru i rîo baarîrîîre Mwathani thîînaani yao,
n'we abakûûra kînyamaarani kîao.
7 Aabatongoreerie njîraani indûngaru,
mwanka baakinya taûni bakîûmba gûtûûra.
8 Îîndî nwa mwanka bûcookerie Mwathani nkaatho n'ûntû bwa wega bwake bûrî wendo,
na n'ûntû bwa mantû ma kûrigaria mara arûthîrîte antû.
9 N'ûntû nabûûtûgagia nkoro ira irî na bûûta ya kûrûtha bûra kûbatîîrue,
na nkoro ira irî na yûûra akaibaithia na mantû meega.
10 Antû bamwe baatûûraga gûntû kwarî mwindu mûno,
baathaîkîîtwe nceera na nyororo.
11 N'ûntû i baareganîîte na biugo bia Ngai,
na baagîra gîtûmi kîrîra kîa Ûra Arî Îgûrû Mûno.
12 Kwoogu aaboreeria nkoro ciao na kûbarutithia ngûgî cia inya,
baagwîyaga, na batoone wa kûbateethia.
13 Rîru i rîo baarîrîîre Mwathani thîînaani yao,
n'we abakûûra kînyamaarani kîao.
14 Aabarutire mwinduuni na mûgunyeeni wa gîkuû,
aagiitaanga nyororo ira ciabathaîkîîte.
15 Barekeerie bacookerie Mwathani wao nkaatho n'ûntû bwa wega bwake bûrî wendo,
n'ûntû bwa ngûgî ciake cia kûrigaria kîrî aana ba antû.
16 N'aunangîîte mîrango ya anthû baake îrûthîîtwe na rûthuku,
na agiitanga mîrîîgo ya îthaga aarekeeria antû baake.
17 Bamwe baarî biaa na baarega kwathîka,
na n'ûntû bwa wîyia na ûthûûku bwao baakaanûkua.
18 Boonaga irio bia mîthemba yonthe bakeegua kîîria nkoro,
baathengeera mîîrîga ya gîkuû.
19 Rîru i rîo baarîrîîre Mwathani thîînaani yao,
n'we abakûûra kînyamaarani kîao.
20 Aariirie kiugo gîake na kîa booria,
na n'aabakûûrire na aagiria bakua.
21 Barekeerie bacookerie Mwathani nkaatho n'ûntû bwa wega bwake bûrî wendo,
n'ûntû bwa ngûgî ciake cia kûrigaria kîrî aana ba antû.
22 Barekeerie barute igongwana bia gûcookia nkaatho,
na baine nyîmbo cia gîkeno bakiugaga mantû mara Mwathani arûthîîte.
23 Kûrî bara baathiiyagîra îriani na meeri
bakîringaga biacaara rûûyîîni rwingîîte ûgu.
24 I beebonagîra ngûgî cia Mwathani bûra ciagana,
na mantû maake ma kûrigaria naagu ndiani.
25 N'ûntû aarutire watho, kîbuubani kîînene kîabuutana,
kîra gîaûkîîrie makûmbî ma rûûyî rwa îria.
26 Meetagia kîthûngûthûngû îgûrû matuuni, makendama kaîrî ndiani,
ûcamba bwa athiithia meeri bwathirania.
27 Baacûgacûgua aaga na aara na baataratara ta antû batogooneete,
na baathirîrwa i ûûme.
28 Rîru i rîo baarîrîîre Mwathani thîînaani yao,
n'we abakûûra kînyamaarani kîao.
29 N'aaboreerie kîbuubani,
na makûmbî ma îria kinya mo maboorerua.
30 Rîru baakena n'ûntû makûmbî mamu i maboreerue,
na Ngai abateethia meeri ciakinya ara beendaga.
31 Barekeerie bacookerie Mwathani nkaatho n'ûntû bwa wega bwake bûrî wendo,
n'ûntû bwa ngûgî ciake cia kûrigaria kîrî aana ba antû.
32 Barekeerie bamûgongere kîgoomanooni gîa antû,
na bamûkaathîre mbere ya akûrû.
33 Aabwethia tuuro twatuîka ng'aarû
na rûûyî rwa inyaka rwaboa biatuîka nthî îîmbûmo.
34 Mûthetu ûmûnoru ûgatuîka kîng'eenyo
n'ûntû bwa ûthûûku bwa antû bara baatwîre ku.
35 Aagarûra ng'aarû yatuîka maria ma rûûyî,
na nthîgûrû îîmbûmo yatuîka inyaka bia rûûyî.
36 Na aarekeeria antû barî na yûûra baatûûra ku,
kaingo baaka taûni ya gûkaraga.
37 Baandire mbeû mîndaani na baanda mîcabiibû,
na boona maketha maingî mûno.
38 Ngai aathaarima antû baake na bongeereka mûno,
na ataareka ng'ombe ciao igaûka.
39 Bagûtua kûthira bakîgaûkaga
n'ûntû bwa kînyamaara, thîîna, na kîeba,
40 we ûra oonoragia kîbûthia kîrî aana ba anene,
na agatûma bariûnga rwanda rûtarî njîra.
41 Îndî n'aûkagîîria bara barî na thîîna akabaruta thîînaani,
na agatûma mîciî yao yongeereka ta ndîîthia ya mbûri na ng'ondu.
42 Bara baagîru boonaga ûgu bagakena,
îndî bara bathûûku bo, bationa bwa kuuga.
43 Bara baûme baraithîîrie mantû mama bwega,
na bathûgaanie wega bûrî wendo bwa Mwathani.