Îromba n'ûntû bwa kûromba Ngai ûteethio
(Sabu 57:7-11; 60:5-12)
Sabuuri ya Ndaundi.
108
1 Nkoro yakwa n'îîbînjîrîîte yaarika, Itû Ngai.Nkaina na ngûkumie na nkoro yakwa yonthe.
2 Ûkîîra, kînanda na wandîndî ya ndigi inyingî!
Ngaûkîîra rûkîîrî mûno rware rûgîtema.
3 Ngagûcookeria nkaatho, Woû Mwathani gatîgatî ga antû,
ngagûkumia na nyîmbo gatîgatî ka mîgongo.
4 N'ûntû wega bwaku bûrî wendo i bûnene mûno kinya îgûrû rîa matu.
Wîtîgîka gwaku igûkinyîte matuuni.
5 Neneua mûno, kûra îgûrû matuuni, Woû Ngai,
na ûkumio bwaku bûkare îgûrû rîa nthîgûrû yonthe.
6 Tûteethie na inya yaku, ûtûcookerie maromba meetû,
Kaingo eendwa baaku bakoonokua.
7 Ngai n'aarîîtie ûtheruuni bwake auga,
“Ngaakena na ngaanie Sekemu,
na ngiitaange kîguuru gîa Sukothi.
8 Ngiriandi n'yakwa, na Manase n'yakwa,
Eburaimu i t'yo nkoobia ya kûrigîîria kîongo gîakwa gîtigaatonywe,
Njunda n'yo i mûraagi wakwa wa ûnene.
9 Moabu i kîraî gîakwa gîa kûthambîra.
Endomu i bantû a gûkinyithia iraatû biakwa.
Firisitia i noogo ngaakururaga nkururo cia ndûa.”
10 N'ûû we agaankinyithia taûniini îmbirige?
N'ûû agantongoreeria kûthi Endomu?
11 Anga ti woû, woû Ngai watûteere
na watiga kûthiiyania na njûûrî cietû ndûani?
12 Tûteethie kîrî mûnthû,
n'ûntû ûteethio bwa muntû i bwa mana.
13 Ngai arî amwe naati tûkaûmbana,
n'we agaakinyanga anthû beetû abathithire.